"ОПГ" Қоспаевпен байланысты жер алаяқтығы үшін үш адам сотталды

Сот шешімімен Аслан Пухаев, Антон Соловьёв және Жақсылық Сәрсенбаев 6 жыл 6 ай мерзімге бас бостандығынан айырылды. Олар аса ірі көлемдегі жер учаскесін заңсыз иемденбек болды деп танылды.

Қаржы мониторингі агенттігінің мәліметінше, 2025 жылдың қыркүйегінде сотталғандар «Азаматтарға арналған үкімет» мемлекеттік корпорациясының ақпараттық жүйесін пайдаланып, «Nikolsky Investment» ЖШС-не тиесілі жер телімінен заңсыз түрде ауыртпалықтарды алып тастаған. Кейін бұл активті қайта сату мақсатында жалған тұлғалардың атына рәсімдеген.

Қазіргі таңда сот жер телімі мен оған қатысты мүлікке тыйым салып, оларды мемлекет меншігіне қайтарды. Үкім заңды күшіне енді.

ҚМА дерегінше, аталған тұлғалар Айдос Қоспаевтың ұйымдасқан қылмыстық тобына қатысы бар. Бұған дейін бұл "ОПГ" Алматыдағы бірқатар компанияларды рейдерлік жолмен басып алды деген айыпқа ілінген. Олардың қатарында AV-Construction, «Стекольный завод», «Бахар-А» компаниялары бар.

Никольский базары – Алматы орталығындағы ең көне сауда орындарының бірі. 2010 жылдардың басында бұл жер телімін Алматы технологиялық университеті жатақхана мен оқу корпустарын салу үшін заңды түрде сатып алған. Алайда көп ұзамай университет сот дауларына тап болды. Белгілі болғандай, дәл осы жер басқа тұлғаларға қайта сатылған.

Университет өкілдерінің айтуынша, бұл схеманың артында марқұм Болат Назарбаев пен Қоспаевтың ұйымдасқан қылмыстық тобы тұрған.

2015 жылы ғимарат пен жер телімі бірнеше мәміле арқылы Назарбаевтың өзіне өткен, ал 2021 жылы — «Nikolsky Investment» ЖШС-не сатылған. Аталған компания мәміледен бір күн бұрын ғана тіркеліп, оның құрылтайшысы Айдос Қоспаев болған. Кейін компания директоры Ерлан Имашев те сотталушылар қатарынан табылды.

Жоғарғы соттың университет пайдасына шығарған шешіміне қарамастан, Алматы технологиялық университеті әлі күнге дейін заңды түрде сатып алған жеріне қол жеткізе алмай отыр және жаңа сот талаптарын дайындауда.

Айта кетейік, тергеу Елдос Қоспаевты («Людоед» лақап атымен белгілі) ұзақ жылдар бойы бизнеске рейдерлік шабуыл жасаған ұйымдасқан қылмыстық топтың жетекшісі деп санайды. ҚМА мәліметінше, "ОПГ" мүшелері кәсіпкерлерді қорқытып, компанияларға өз адамдарын енгізіп, басқарудан шеттетіп, табысты заңсыз иемденген. Қоспаев Болат Назарбаевтың айналасында болған тұлға ретінде аталады.

Өткен жылдың қаңтарында сот Қоспаевтар мен олардың сыбайластарын қылмыстық қауымдастық құру, бопсалау және мүлікті заңсыз иемдену баптары бойынша кінәлі деп танып, үкім шығарған.