Орал тұрғыны ресейлік заңға сүйенген дүкенді сотқа берді

Настоящее Время телеканалының жазуынша, Руслан Сатыбалдин – Оралдағы «Детский мир» дүкенінің тұрақты клиенті. Ол дүкеннен балаға арналған жөргектерді сатып алған, алайда үйге келген соң артық алып қойғанын байқап, қолдау қызметіне хабарласқан.

– «Жергөкті артық алып қойыппын, қалай қайтаруға болады?» деп сұрадым. Ал олар маған:

«Бұл тауар сапалы, сондықтан қайтаруға немесе айырбастауға жатпайды — Ресей Федерациясы Үкіметінің 2020 жылғы 31 желтоқсандағы қаулысына сәйкес», – деп жауап берді», — дейді Сатыбалдин.

Бастапқыда ол мұны түсінбей, қателік шығар деп ойлаған. Келесі күні қайта тексеріп қараса, шынында да жауапта «Постановление Российской Федерации» деп жазылғанын көрген.

– «Қолданбада “Детский мир Казахстан” деп тұр. Ал маған Ресей заңына сілтеме жасап отыр. Бұл қалай?» – дейді Сатыбалдин.

Компания қателігін мойындады, бірақ өтемақы төлеуден бас тартты

Азамат сотқа дейінгі талап-арыз жолдап, «Детский мир» компаниясынан түсініктеме сұраған. Тұтынушылардың құқығын қорғау комитеті де Сатыбалдиннің айтқанын растады — дүкен Қазақстан заңдарына бағынуға тиіс.

Тексеру нәтижесінде компания оператордың кінәсін мойындап, оны жұмыстан босатқан:

«Оператор Ресей Федерациясының заңнамасына сілтеме жасап, қателік жібергені үшін 2025 жылдың 1 шілдесінен бастап жұмыстан шығарылды. Оның жүйедегі қосымшасы бұғатталды», — делінген «Детский мир – Қазақстан» компаниясының директоры Николай Ставердің ресми жауабында.

Алайда компания материалдық өтемақы төлеуден бас тартқан, сондықтан іс сотқа жетті.

Сот отырысы кезінде жаңа деректер де белгілі болды.

"Компания өкілі кездейсоқ айтып қалды: “Біздің колл-орталық Ресейде орналасқан”. Сонда мен судьяға: “Бұл — Қазақстан азаматтарының жеке деректері шетел аумағында өңделіп жатыр деген сөз. Осыған байланысты Цифрлық даму министрлігінен тексеруді сұраймын” дедім", — дейді Руслан Сатыбалдин.

Алайда сот оның бұл өтінішін қанағаттандырмады.