Орал тұрғыны ескерткішті сүруді талап етті

Қала тұрғыны Николай Винк өзінің меншігіне жататын аумаққа орнатылған интернационалист-жауынгерлерге арналған стеланы алып тастауды талап етіп, әкімдіктің әрекеттерін заңсыз деп тануды сұрады.

Айтуынша, ол аталған жер телімін 2016 жылы ағасынан заңды түрде иеленген. Барлық құжаттар рәсімделгеніне қарамастан, кейіннен бұл аумаққа жергілікті билік шешімімен ескерткіш қойылған. Тұрғын мұны жеке меншік құқығын бұзу деп бағалап отыр.

Ал әкімдік өкілдері өз кезегінде бұл аумақтың қала үшін қоғамдық маңызы бар нысанға айналғанын алға тартады. Бұған дейін жер телімін мемлекет қажетіне алу немесе меншік иесіне өзге учаскелермен айырбастау мәселесі қарастырылған.

Қазір сотта тараптардың уәжі тыңдалып, әкімдіктің әрекетінің заңдылығы тексерілуде. Қорытынды шешімді сот алдағы уақытта шығаратын болады.

Бұл жағдай Оралдағы жер қатынастары мен қоғамдық нысандарды орналастырудағы заңдылық мәселесін қайта күн тәртібіне шығарды.