Жазылу
Өскемен оқушылары ауа ластануы салдарынан онлайн оқуға көшірілді
Өскемен қаласында ауа сапасының күрт нашарлауына байланысты мектеп оқушылары қашықтан оқыту форматына ауыстырылды. Бұл шешім қала әкімдігі мен облыстық білім басқармасы бірлесіп қабылдаған.
Ресми хабарламада 24 қазан күні қалада ұзақ уақыт сақталған қолайсыз метеорологиялық жағдайларға байланысты (ІІ дәрежелі НМУ) барлық мектептердің оқу процесі онлайн форматта өтетіні айтылған. Бұл шешім «Қазгидромет» мекемесінің өңірлік филиалының ресми хатына сүйене отырып қабылданған.
Соңғы апта ішінде қала тұрғындары ауаның ластануына және тыныс алудың қиындауына шағымданып келеді. 22 қазан күні Өскеменді қалың «тұман» басқан, алайда кейін бұл табиғи құбылыс емес, зиянды газдардың жиналуы екені анықталған. Атмосферада күкірт диоксидінің мөлшері шамамен үш есеге артқаны тіркелген.
Ауадағы өткір газ иісі мен түтінге байланысты көптеген ата-аналар балалардың денсаулығына алаңдап, қашықтан оқуға көшіруді талап еткен. Алғашында білім бөлімі мұндай шараны қажет деп санамағанымен, жағдайдың ушығуына байланысты шешім қабылданды.
Қазір қалада экологиялық ахуалды тұрақтандыру және ауа сапасын жақсарту мақсатында тиісті қызметтер күшейтілген режимде жұмыс істеп жатыр.
