Жазылу
Парсы шығанағындағы екі ел Иранға қарсы соғысқа қосылуы мүмкін — WSJ
Парсы шығанағындағы бірқатар елдер Тегеранға қарсы қақтығысқа барған сайын терең тартылып барады. Сауд Арабиясы АҚШ-қа өз әскери базасын пайдалануға рұқсат берсе, Біріккен Араб Әмірліктері әскер жіберу мүмкіндігін қарастырып жатыр.
Бұл туралы The Wall Street Journal басылымы жазды.
Сауд Арабиясының позициясы
Басылым дереккөздерінің айтуынша, тақ мұрагері Мұхаммед бен Салман АҚШ-тың Иранға қарсы соққыларына қосылу мәселесін қарастырып отыр. Кейбір мәліметтерге қарағанда, корольдіктің соғысқа кіруі уақыт мәселесіне айналған.
Соғыс басталғанға дейін Сауд Арабиясы өз аумағы мен әуе кеңістігін пайдалануға қарсы болған. Алайда Иран маңызды энергетикалық нысандар мен Эр-Риядқа зымырандар мен дрондармен соққы жасай бастағаннан кейін бұл ұстаным өзгерген.
Осыдан кейін Сауд Арабиясы АҚШ әскеріне король Фахд атындағы әуе базасын пайдалануға рұқсат берген.
Сыртқы істер министрі Фейсал бен Фархан әл-Сауд корольдіктің «шыдамы шексіз емес» екенін айтып, Парсы шығанағы елдері Иранға жауап бере алмайды деген пікірдің қате екенін мәлімдеді.
БАӘ-нің әрекеті
WSJ мәліметінше, Біріккен Араб Әмірліктері Иранға экономикалық қысымды күшейтіп жатыр.
– Дубайда Иранмен байланысты мекемелер жабылған;
– Иран активтерін миллиардтаған доллар көлемінде бұғаттау мәселесі қаралуда;
– әскер жіберу ықтималдығы талқылануда.
Сонымен қатар БАӘ АҚШ-ты Иранның әскери әлеуеті айтарлықтай әлсірегенге дейін бітімге келмеуге шақырып отырғаны айтылды.
Басылым атап өткендей, Сауд Арабиясы мен БАӘ-нің әрекеттері араб монархияларының АҚШ пен Израильдің Иранға қарсы операциясына тереңірек тартылып жатқанын көрсетеді.
Сонымен қатар бұл елдер әскер жіберу оларды Иранның ашық қарсыласына айналдырып, соғыстан кейін АҚШ аймақтан кетсе, Тегеранмен күрделі қатынаста жалғыз қалдыруы мүмкін екенін де түсінеді.
21 наурызда Сауд Арабиясы Иранның әскери атташесін, оның көмекшісін және дипломатиялық миссияның тағы үш қызметкерін елден шығарып жіберді. Бұл шешім Иран тарапынан жалғасып жатқан шабуылдармен түсіндірілді.
Бұған дейін 12 араб және ислам елінің сыртқы істер министрлері Иранды көрші мемлекеттерге шабуылдарды тоқтатуға шақырған. Әйтпесе бұл бүкіл Таяу Шығыс қауіпсіздігіне қатер төндіруі мүмкін екені айтылған.
Хуситтер факторы
WSJ мәліметінше, Сауд Арабиясы мен АҚШ Йемендегі хуситтердің соғысқа Иран жағында араласуына жол бермеуге тырысып жатыр.
Егер олар қақтығысқа қосылса:
– Суэц каналы мен Египет те тартылуы мүмкін;
– бұл Сауд Арабиясының соғысқа кіру ықтималдығын одан әрі арттырады.
