Перизат Қайрат қылмыстық істі әдейі созып жатыр — ҚМА пікірі

Агенттік төрағасының орынбасары Жеңіс Елемесовтің айтуынша, күдікті 2025 жылдың 9 маусымына дейін іс материалдарымен танысып бітуі тиіс.

«Осы мерзімнен кейін оған және адвокаттарына өтініштер жолдау үшін 3 күн беріледі. Одан соң іс прокуратураға жіберіледі. Прокуратура оны сотқа жіберу немесе жібермеу туралы шешімді 10 күн ішінде қабылдайды», - деді Елемесов.

Агенттік өкілі тергеу кезінде осы іске қандай да бір қатысы бар деген негізбен 100-ге жуық адамнан жауап алынғанын атап өтті.

Еске салайық, 2024 жылдың қарашасында Қаржылық мониторинг агенттігі еріктілер қозғалысының белсендісі әрі қайырымдылық қорының негізін қалаушы Перизат Қайратқа қатысты тергеу жүргізіліп жатқанын хабарлады. Ол 2024 жылғы көктемгі су тасқынынан зардап шеккендерге көмек көрсету үшін жиналған 1,5 миллиард теңгеден астам қаражатты жымқырды деген күдікке ілінген.

Тергеу дерегінше, бұл қаражат қымбат бұйымдар мен жылжымайтын мүлік сатып алуға жұмсалған. Көктемде Перизат Нұр-Сұлтандағы автосалондардан үш бірдей премиум автокөлік сатып алған:

• Mercedes-Benz S450 — 88 миллион теңгеге
• Lexus LX-600 — 80 миллион теңгеге
• Haval — 39 миллион теңгеге

Сондай-ақ ол Астанадағы “Ақбулак Ривьера”, Highvill Ishim Gold, “Көк Жайлау” тұрғын үй кешендерінен элиталы пәтерлер (паркинг орындарымен қоса) және Vela Village коттедж қалашығынан жылжымайтын мүлік сатып алған. Бұл мүліктің жалпы құны 600 миллион теңгеден асады.