Жазылу
Перизат Қайраттың ісін тергеу аяқталып, келтірілген шығын көлемі белгілі болды
«Қаржы жымқырды» деп айыпталған «BizBirgemiz» қайырымдылық қорының басшысы Перизат Қайратқа қатысты қылмыстық іс бойынша тергеу аяқталды.
Бұл туралы Астанада Қаржы мониторингі агенттігі төрағасының орынбасары Жеңіс Елемесов мәлім етті.
"Перизат Қайратқа қатысты қылмыстық істің аяқталды. Қазіргі уақытта процеске қатысушылар қылмыстық іс материалдарымен танысып жатыр", - деді Елемесов журналистерге Сенат отырысында.
Ол Перизат Қайраттың заңсыз ісінен келген шығын көлемі 3,5 миллиард теңгеге (шамамен жеті миллион доллар) бағаланғанын хабарлады. Бұған дейін тергеу органдары азырақ сома – 1,5 млрд теңге деп мәлімдеген болатын.
Елемесовтың айтуынша, Перизат Қайрат қылмыстық жолмен, атап айтқанда, «Rebel Flowers» гүл дүкенін сатып алу және пайдалану арқылы алынған ақшаны жылыстатқан деген күдікке ілінген.
Ведомство төрағасының орынбасары Перизаттан тәркіленген мүліктің – жылжымайтын мүлік, көлік, зергерлік бұйымдар және басқа да заттардың тағдырын сот шешетінін айтты.
Елемесовтың айтуынша, Қазіргі уақытта Перизат Қайрат пен оның анасы Ғайни Алашбаева да күдікті ретінде ұсталған.
Перизат Қайрат 2024 жылдың қараша айының басында ұсталды. Қаржы мониторингі агенттігінің мәліметінше, ол көктемгі су тасқынынан зардап шеккендерге жиналған ақшаға Астанадағы төрт тұрғын үй кешенінен жылжымайтын мүлік, Mercedes-Benz S450, Lexus LX-600 және Haval премиум көліктері, сондай-ақ басқа да қымбат заттар сатып алуға жұмсаған. Бір аптадан кейін оған Палестинаға гуманитарлық көмек ретінде жиналған 200 миллион теңгеден астам (шамамен 400 мың доллар) ақша жымқырды деген айып тағылды, деп хабарлайды қаржы мониторингі агенттігі. Соттың санкциясымен Перизат Қайрат қамауға алынды. Анасы бұлтартпау шарасымен үйқамақта.
Перизат Қайрат ісіне байланысты Қазақстан билігі «Қайырымдылық туралы» заңға өзгерістер енгізу туралы бастама көтерді. Ұсынылып отырған шаралардың қатарында қайырымдылық қорларын міндетті түрде аккредиттеу, төтенше жағдайлар кезінде қайырымдылық жинай алатын ұйымдарды анықтау өкілеттігін әкімдіктерге беру, сондай-ақ қаражатты өз бетінше жинаған тұлғаларға айыппұл салу қарастырылған.
