Президент Шымкентте кісі қолынан қаза тапқан Нұрай жайлы айтты

«Нұрай күдіктінің кесірінен қауіп-қатерге ұшыраған. Осыған байланысты мен Ішкі істер министрлігіне Шымкент қалалық полиция департаментінің іс-әрекетіне құқықтық баға беруді тапсырдым. Бас прокуратура да жеке тексеріс жүргізіп жатыр. Ондай қатыгездікке жол беруге болмайды», - деді Қасым-Жомарт Тоқаев.

Естеріңізге сала кетсек, Шымкентте 21 жастағы студент Нұрай Серікбай қайғылы жағдайда көз жұмды.

11 қаңтар күні Нұрай дүкеннен ұн алуға шыққан, оны үйін торуылдап жүрген күдікті ұстап алып, артынан қуып, пышақтаған. Әлеуметік желіде тараған видеода жас жігіттің Нұрайды артынан қуып келіп, бірнеше рет пышақтағаны бейнеленген.

Кейіннен күдіктінің 28 жастағы жігіт екені белгілі болды. Ол Шымкенттен 10 шақырым жерде ұсталды. Күдіктіге қатысты кісі өлтіру бабы бойынша тергеу басталды.

Бұл оқиға қоғамда үлкен резонанс тудырып, әлеуметтік желілерде қыздың қауіпсіздігі, аңду мен қудалау (сталкинг) фактілеріне құқық қорғау органдарының дер кезінде әрекет етпеуі, сондай-ақ әйелдерге қатысты зорлық-зомбылықтың алдын алу мәселелері кеңінен талқыланып жатыр.

Нұрай Серікбайдың туыстары ұсталған күдіктіге қатысты ең ауыр баптармен қылмыстық іс қозғалуын талап етті.

Jas Alash youtube арнасы Нұрай Серікбайдың ағасы Сұлтан Серікбаймен сұхбаттасты.