“Президент сын айтты”: Скляр Марат Қарабаевтың отставкасына түсініктеме берді

Ақордада өткен жиында журналистер қойған сұраққа жауап берген Скляр Қарабаевтың жұмысына қатысты президент Қасым-Жомарт Тоқаевтың сындарына тоқталды.

— Президент қауіпсіздік кеңесінің отырысында көлік министрлігінің жұмысына байланысты елеулі сын айтты. Бұл – жай ғана пікір емес, нақты шешім қабылдауға негіз болған сыни баға. Мемлекеттік органдарға жүктелген міндеттер бар, солар уақытында және сапалы орындалуы тиіс. Қарабаев аталған міндеттердің бір бөлігін орындады, алайда толық көлемде нәтиже болмады. Енді жаңа министр сол жұмысты жалғастырады, – деді Скляр.

Ал Қарабаевтың отставкасы туралы ресми ақпарат 10 маусым күні жарияланғанымен, Ақорда бұл шешімді 8 маусымда қабылдаған. Яғни министрдің қызметтен кетуі сапар барысында белгілі болған.

Марат Қарабаев Көлік министрі қызметін 2023 жылғы 2 қыркүйектен бастап атқарды. Бұл – сол кезде жаңадан құрылған салалық ведомство болатын. Қарабаев — үкіметтегі ең жас министр атанған шенеунік. Ол 1987 жылы 4 шілдеде дүниеге келген.

2025 жылғы 14 мамырда президент Қасым-Жомарт Тоқаевтың төрағалығымен өткен Қауіпсіздік кеңесінің отырысында Қарабаевқа жұмыстағы кемшіліктері үшін сөгіс жарияланған болатын. Мемлекет басшысы сол жиында көлік-логистика саласындағы проблемаларға ерекше назар аударып, шұғыл әрі нақты шаралар қабылдауды тапсырған еді.

Қарабаев – “Болашақ” бағдарламасының түлегі. Ол 2010 жылы Ұлыбританиядағы Уорвик университетін «Өндірісті-жүйелік инженерия» мамандығы бойынша үздік аяқтаған. Сондай-ақ 2015 жылы Тараз мемлекеттік университетінен «Экономика» мамандығы бойынша білім алған.