Путин 2025 жылға арналған әскери шақыру туралы жарлыққа қол қойды

Жарлықта әскери қызметке 18 бен 30 жас аралығындағы азаматтар алынатыны нақты көрсетілген. Бұл 2024 жылдан бастап Ресейде әскери міндеттілердің жас шегінің ұлғайтылуымен тікелей байланысты. Бұған дейін жоғарғы жас шегі 27 болса, қазір 30 жасқа дейін кеңейтілген.

Әскерге шақыру екі кезеңмен өтеді

Құжатқа сәйкес, мерзімді әскери шақыру бұрынғыдай екі кезеңде жүзеге асырылады. Біріншісі, көктемгі шақыру – сәуір айынан шілде айының ортасына дейін. Екіншісі, күзгі шақыру – қазан айынан бастап жыл соңына дейін.

Бұл кезеңдер Ресейдегі әскери комиссариаттардың жұмыс кестесіне сай белгіленген және жыл сайын қайталанып келеді.

Қызметін өтеп болғандар әскерден босатылады

Жарлықта тек жаңа шақырылушылар ғана емес, қызмет мерзімі аяқталған әскери қызметшілерді запасқа шығару мәселесі де қарастырылған.

Бұл шешім Қарулы күштер құрамын жоспарлы түрде жаңартып отыруға бағытталған.

Ресейде мерзімді әскери қызмет ресми түрде Украинадағы соғысқа қатыспайды деп жарияланғанымен, соңғы жылдары бұл мәселе қоғамда үлкен алаңдаушылық тудырып отыр. Бұған дейін ресейлік билік мерзімді сарбаздар майданға жіберілмейтінін мәлімдегенімен, түрлі өңірлерде шақырылған жастардың соғыс аймағына түскені туралы деректер жарияланған.

Сарапшылардың пікірінше, биылғы 261 мың адамдық шақыру Ресей армиясының кадрлық әлеуетін тұрақты деңгейде ұстап тұруға және ұзаққа созылған соғыс жағдайында резерв қалыптастыруға бағытталған.