Путин Зеленский кеңсесіне «Орешник» зымыранымен соққы жасауға келіспеген – Лукашенко

Belta.by жазғандай, Лукашенко «инсайдерлік ақпаратқа» сілтеме жасап:

— «Ресейде біреулерде сондай идея болған. Кім екенін айтпаймын. Путин бұл ұсынысқа «ешқашан» деп жауап берді. Соққы жасауға дайын тұрған. Егер «Орешникпен» соққы жасалғанда, олардың сөзімен айтқанда, шешім қабылдау орталықтарынан із де қалмас еді», – деді.

Бұған дейін Лукашенко Беларусь аумағында 2025 жылдың соңына дейін «Орешник» зымыран кешенін орналастыру жоспарланып отырғанын мәлімдеген еді.

• «Орешник» – орта қашықтыққа арналған баллистикалық зымыран;

• Ұшу қашықтығы – 5500 км дейін;

• Жылдамдығы – 10 Мах (сағатына 12,4 мың км);

• 900 кг-ға дейінгі ядролық оқтұмсық алып жүре алады.

Айа кетейік, былтыр қараша айында  Путин ресейлік әскерлер орта қашықтықтағы жаңа «Орешник» баллистикалық зымыранын сынақтан өткізгенін хабарлады. 

Ресей президентінің айтуынша, Ресей бұл зымырандарды Украина Қарулы Күштерінің қарашаның 19-ы мен 21-і күндері Брянск және Курск облыстарындағы нысаналарға ATACMS және Storm Shadow зымырандары арқылы жасаған шабуылына жауап ретінде атқан. Путин УҚК шабуылы кезінде Курск облысындағы командалық пункттер арасында қаза тапқандар мен жараланғандар болғанын, бірақ Брянск облысына жасалған шабуылда ешкім зардап шекпегенін айтты.

Путин «Орешникті» қолдануды АҚШ-тың орта және қысқа қашықтықтағы зымырандарды жасау және сынақ жоспарларына жауап деп атады.

21 қараша күні таңертең Ресей Қарулы Күштері Днепропетровск облысына зымырандардың бірнеше түрімен, атап айтқанда, құрлықаралық баллистикалық зымыранмен шабуыл жасады, деп хабарлады Украина Әскери-әуе күштері. Бұл құрлықаралық баллистикалық зымыранның әскери мақсатта пайдаланылуы тарихта бірінші рет болды.