Жазылу
Путинді сынаған Z-блогер психиатриялық ауруханаға жатқызылды
Навальныйға қарсы арыздар жазып келген кремльшіл блогер күтпеген жерден Путинді қатаң сынға алып, Украинадағы соғысты «тұйыққа тірелген жағдай» деп атады. Осыдан кейін, БАҚ мәліметінше, Илья Ремесло психиатриялық ауруханаға жатқызылған.
Ресейде осы апта басында президент Владимир Путинді өткір сынға алған үкіметті қолдаушы блогер Илья Ремесло Санкт-Петербургтегі №3 қалалық психиатриялық ауруханаға жеткізілді. Бұл туралы 19 наурыз күні алғашында басқа Z-блогерлер жазса, кейін ақпаратты «Фонтанка» басылымы растады. Медициналық мекеменің анықтама қызметі журналистерге мұндай есімдегі науқастың расында тіркелгенін хабарлаған.
Байланыс үзіліп, кейін ауруханаға түскені белгілі болды
БАҚ мәліметінше, 19 наурыз таңертең Ремесло бір күн бұрын белсенді түрде сұхбат беріп жүргеніне қарамастан, байланысқа шықпай қалған. Бірнеше сағат бойы ол әлеуметтік желілерде де көрінбеген.
«Фонтанка» басылымы оның жатқан бөлімінің сипатына қарап, Ремесло бұған дейін психиатрлардың бақылауында болмағанын атап өтті. Сондай-ақ интернетте блогердің әпкесі Санкт-Петербургте танымал психиатр дәрігер екені туралы мәліметтер тарады.
Илья Ремесло кім?
Илья Ремесло — Ресей Қоғамдық палатасының бұрынғы мүшесі, заңгер. Ол өз блогында ұзақ уақыт бойы Ресей билігін қолдап, оппозицияны сынап келген.
Сонымен қатар, Ремесло:
Алексей Навальный мен оның серіктеріне қарсы бірнеше арыз жазған;
ФБК (Сыбайлас жемқорлыққа қарсы қор) қаражаты бойынша «алаяқтық» ісінде белсенді рөл атқарған.
Күтпеген мәлімдеме
17 наурыз кешінде және 18 наурыз таңында Ремесло кенеттен Кремль саясатын қатты сынға алған бірнеше жазба жариялады.
Атап айтқанда:
Украинадағы соғысты «тұйыққа тірелген» деп атады;
Владимир Путинді «легитим емес президент» деп айыптап, соттауды ұсынды.
Бұл мәлімдемелер Z-патриоттар арасында үлкен резонанс тудырды.
Мысалы, Шешен арнайы жасағының басшысы Апти Алаудинов блогерді «ел үшін ең қиын кезеңде хайп қуып жүр» деп сынға алды.
Сондай-ақ Ремеслоның аккаунты бұзылған болуы мүмкін деген болжамдар да айтылды. Алайда блогердің өзі 18 наурыз күні бұл ақпаратты жоққа шығарған.
18 наурыз күні Ремеслодан сұхбат алған журналист Александр Плющев егер оның ауруханаға жатқызылғаны расталса, бұл Ресей билігі үшін «ең тиімді дағдарыс-менеджмент» болатынын айтты.
«Ремеслоның сұхбат барысында айтқан сөздері ешқандай сандыраққа ұқсамайды», — деді Плющев.
