Қарағандының ауыз суында құрт қалқып жүреді

 Қала әкімі Мейрам Кожухов пен «Қарағанды Су» компаниясының бас директоры қала тұрғындары ішіп отырған ауыз судың қалай тазартылатынын тікелей эфир арқылы жұрттың назарына ұсынды. «Қарағанды Су» ЖШС мамандары ауыз судың тұрғындарға жеткенше зертханада бірнеше кезең бойынша тазартудан өтетінін мәлімдеді. Қала әкімі Мейрам Кожуховтың ауыз суды тазарту нысанына келуіне, жақында ауыз суға қатысты шыққан дау-дамай себеп болған. Гоголь көшесінің тұрғындары үйлеріне келіп тұрған ауыз судан жыбырлап жүрген құрт тауып алған. «Қарағанды Су» компаниясы құрт шыққан суды алып зерттеп көрген болатын. Алайда мамандар ауыз судан зиянды заттардың табылмағанын мәлімдеді. Ауыз сумен қамтамасыз ететін компания басшылығы бірнеше кезеңнен тұратын тазартудан өтіп барып халыққа жететін суда құрт болмайды деп отыр. Мамандар Гоголь көшесіндегі судан құрт шыққан тұрғындарға үйдегі су өтетін құбырларды ауыстыру керек деген кеңес берді. Алайда тікелей эфирді көрген қарағандылықтардың басым бөлігі ауыз су сапасының нашар екенін айтып, су тазарту нысанының жұмысына сенімсіздікпен қарайтындарын жазды.

Қала басшысы Мейрам Кожухов тікелей эфирде бір стақан суды сіміріп ішіп, ерлік жасағандай бір масайрап қалды.

«Боржоми емес, бірақ соған жақын, судың дәмі жақсы», – деп баға берді де «Қарағанды су» компаниясының бастығына «суға құртты тазартудың қай кезеңінде қосасыздар» деген қалжың аралас сауал қойды. Дегенмен халықты ауыз сумен қамтып отырған компания өкілдері бірнеше тазартудан өтетін суда құрт болуы мүмкін емес деп ат тондарын ала қашты. Қала әкімінің суды тазарту жұмысын бақылаған әрекетін көрсету үшін тікелей эфирде ауыз суды ішуі біраз жұртқа жақпай қалды.

Әлеуметтік желіде тұрғындар Қарағандының ауыз су сапасының нашар екенін, үнемі хлор иісінің шамадан тыс көп шығып тұратынына шағымданады. Тұрғындар мұндай суды әкімнің үйінде ішпейтіні анық деп топшылайды.