Қазақстан құрамасы Финляндиядан ұтылып қалды

«Астана Аренада» өткен ойында қонақтар 0:1 есебімен жеңіске жетті.

Ойынның бірінші таймында есеп ашылған жоқ. Қауіпті сәттер де көп болмады. Аслан Дарабаевтың бір соққысын фин қақпашысы Лукас Градецки қайтара білді. 

Жалғыз голды қонақтар сапындағы Оливер Антман соқты. Ол 78-ші минутта мергендігімен көзге түсті. Ал жерлестеріміз қанша тырысқанымен, ойын соңына дейін таразы басын теңестіре алмады.

Осылайша, Магомед Әлиев баптайтын жігіттер 9 ұпаймен топтағы екінші орнын әзірге сақтап қалды. Ал Финляндия құрамасы 12 ұпаймен сенімді түрде топ басына шықты.

Бірер күннен кейін іріктеу матчтары қайта жалғасады. Оның аясында Қазақстан енді тағы да өз алаңында Солтүстік Ирландияны қабылдайды. Матч 10 қыркүйекте өтеді.