Қоңыр дәптерге қонған ойлар

                                            ххх

Сана қалғып кетсе адам мал боп кетеді. Адамның ата жауы  арақ, есірткі болатыны, сондықтан.  Арақ пен азғындық – медальдің екі беті.

                                            ххх

Ұятсыздық осылай үдей берсе, күндердің-күнінде жұрт телеэкранда жалаңаш жүретін болар. Жабайы өркениеттің барар жері, осы.

                                           ххх

Әке, бала мен ана. Осы үштік Алла жобасы. Алла әмірінсіз әке – әке, ана – ана, бала – бала болмайды. «Бір жынысты неке» дегендерге айтарымыз осы.

                                            ххх

Бес жылдығын ойламаған ерден, елу жылдығын ойламаған елден без.

                                           ххх

Өзінің маржанын елемей, өзгенің арзанын әспеттеп еліктей беру – елдің соры. 

                                           ххх

Бақытсыз халықтың алдында жүрген зиялылары бақытты болса, бақытсыздықтың үлкені осы. Бұндай бақытты зиялылар халқын құрдымға батырады.

                                          ххх

Қоғамың қалай болса адамың солай, адамың қалай болса қоғамың солай.

                                           ххх

Құм жиылып тас болмас, құл жиылып бас болмас.

                                           ххх

Жақсы басшы – құт, жаман басшы – жұт.

                                           ххх

Нәпсі құлқын хандарды құл етсе, сабыр қанағат құлдарды хан етеді.

                                           ххх

Сырт көзге сенің елің емес, жерің керек.

                                           ххх

Додасында дүниенің, көкпарға тартқан лақтай, қанжығада кетпейік!

                                           ххх

«Елім-күнім болмаса, айым-күнім тумасын» деп өтіпті бабалар.

                                            ххх

Капитализм де, социализм де – бізді бақытқа бөлемеді. Енді бір туса гуманизм заманы туар. Тумаса тарихтың зауалы туар.

                                             ххх

Бақыттың да бақыты бар. Соның ішіндегі ең ірі бақыт –ұлттық Тәуелсіздікке үлес қосу.                                 

                                           ххх

Қазақ тілін қорғай алмаған Тәуелсіздік, қандай Тәуелсіздік?

                                          ххх

Басшысы жоқ ел жетім, жастары жоқ тіл жетім.

                                           ххх

Адам баласы арман еткен абсолютті азаттық, жүгенсіз либерализм – бала қолына ұстатқан өткір бәкі іспеттес. Өткір бәкі – балаға қатер.  Ендеше, жүгенсіз либерализм, ауыздықсыз азаттық  абсурдқа алып барары анық.

                                           ххх

Азғындық жыл санап емес, ай санап, ай санап емес, күн санап балалап келеді. 

                                           ххх

Өзінің түйедей мінін көрмейтіндер, өзгенің түймедей мінін көргіш.

                                            ххх

Бақытсыз елге батыр керек, жоқ болса оны ойлап табады.

                                             ххх

Адамды ақыл қалай басқарса, әлемді Алла солай басқарады.

                                             ххх

Құдайдың құлы болмаған, нәпсінің құлы болады. Сайтанның құлы болады.

                                             ххх

Үлкен бол да кіші бол, иманы кәміл кісі бол.

                                             ххх

Нәпсі тән қалауы, иман жан қалауы.

                                             ххх

Нәпсі – дұшпан, иман – дос. Иманыңа иман қос.

                                            ххх

Арақты балдай татқаның, күнәға белден батқаның.

                                            ххх

Ләззат қуған у татар. 

                                            ххх

Кәрілік ашар өткен күнәйіңді, көбейтер күндеріңді уайымды.

                                             ххх

Өмір бойы ойланбай, өлерінде өкінеді адамның жаман баласы.

                                              ххх

Адам пендеге мал бітсе, жал бітеді.

                                              ххх

Әр Мұсаның соңында – бір Перғауын.

                                              ххх

Жолдас болсаң арамға, күндердің күні болғанда итере салар аранға.

                                             ххх

Жоқтық сынына шыдаған пенде, тоқтық сынына шыдамапты.

                                             ххх

Өзгеге жасаған қастандық, анығына келгенде, өзіңе жасаған қастандық.

                                              ххх

Кісі ақысын жеп бай болуға болар, бірақ бақытты болуға болмайды. 

                                               ххх   

Әр пендеден әр істің сұралады есебі, Таңда-Мақшар болғанда, сауап пенен күнәңіз таразының басына тартылады деседі.

                                               ххх

Сол Күні жұлдыздар Жерге түсер аспандағы, кәпірлердің таяды бастан бағы. Бастан бағы таяды асқандардың.

                                               ххх

«Құдай деп, халқым деп өмір сүргендердің жүзі екі дүниеде жарық» дейді.

                                                ххх

Дін түзелмей, мін түзелмейді.

                                               ххх

Бұ дүниеде қалып жиған байлығың, О дүниеге барар иман байлығың.

                                                ххх

«Аллаға сенген құстай ұшар, адамға сенген мұрттай ұшар» дейді.

                                                ххх

Көрістанды көрген жұрт, гүлістанды аңсаса несі айып?!

                                                 ххх

Алаштың жауы – алауыздық. Күні кеше бірі бәлшебек болып, бірі Алаш болып, бір-біріне қарсы атылған оқ болды. Екеуі де жоқ болды.

                                                ххх

Аштықтан санасы сансырап шыққан халықты тоталитарлық тоқпақ арда болмысынан айырды.

                                               ххх

Әйелдің өз отағасын пір тұтуы кемдігі емес, кеңдігі. «Жаратушы ерге – бас, әйелге жүрек берген» дейді жапондар. 

                                              ххх

Әйел ашылса – арзан, қымтанса – қымбат.

                                              ххх

Үндемеген әйел – үйдей пәледен құтылады.

                                              ххх

Әйел – үйдің ажары, ұлттың ұяты.

                                               ххх

Әлеуметтік ауыртпалық алдымен әйелдің иығына түседі.

                                               ххх

Әйел адам: «Ер адам әйелге тең» десе қате.

Ер адам: «Әйелді еркектен кем» десе қате.

                                              ххх

Әйелге әлімжеттік жасау – әлсіз еркектің әрекеті.

                                               ххх

Көргенді жерден келін ал, көгерсін десең көсегең.

                                               ххх

Ашаршылық – ұлттық қасірет. Бұл ұлттық қасіретті айдың-күннің аманында ұлықтай алмау – одан да өткен  ұлттық қасірет.

                                               ххх

Жалпақшешей саясат ұстанып жан-жағымызға жалтақтаумен жүргенде тіліміз түгел архаизмге айналып кетпесе неғылсын. 

                                              ххх

Тілге достың мұңы жоқ тілден басқа.

                                              ххх

Қайран тілім қор болды бұ қазақтың езіне.

                                              ххх

Қазақ тілі соңғы 100 жылда тек сарқылумен келеді, тек тамырынан тартылумен келеді.

                                                ххх

Кімге күле қарасаң, көйлегіне жамау сұрайды.

                                                ххх

Аңға түсер ақсұңқар тұғырында талпынар, шу шыққанда 

шын тұлпар қазығында шарқ ұрар.

                                                 ххх

Алақандай бетінде асықтай ар қалмаған.

                                                 ххх

Жатты талай жалқаулық пен олақтық, 

Біздің елдің көк картасын жолақ қып.                     

                                                ххх

Қараңғылықты қараңғылықпен емес, жарықпен жеңесің.

                                               ххх

Төмендесең – табанын сүртеді, аспандасаң – аяғыңнан тартады.

                                               ххх

Қара үзіп шықсаң қарауылға ілдіреді.

                                               ххх

Жатық айтсаң – жағымпазсың, тік айтсаң – тұрпайысың.

                                               ххх

Тірі жүрсең таптайды, өле кетсең жоқтайды.

                                                ххх

«Бұ дүниеде көздің жасымен жуылған көз ғана о дүниеде Құдай Тағаланы көре алады» (Фатима Нишапури. 8 ғ.)

                                                ххх

Қанша батыр болса да жауға салма қазақты. Өйткені ол – өлгенін білмейтін өлермен халық.

                                                 ххх

Жазғытұры болғанда Ұлы Дала қырлары қызғалдаққа толады. Көз жауын алатын қызғалдақтар! Қызғалдақтар! Осы жер үшін шайқастарда тамған ата-баба қанындай көрінеді де тұрады.   

                                                 ххх

«Пайғамбарлар жоғары білім алмаған» дейді, бірақ «білімді Жоғарыдан алған» дейді.

                                                ххх

Өзі Сайтан адам өзгені түгел Сайтан көреді. Сорақысы сол, ол «өзгенің бәрі өзіндей Сайтан болса екен» дейді. Бүгінде желөкпе жастарымыздың сондайларды жалаулатып, сондайларға ілесіп жүретіні, өкінішті. 

                                              ххх

«АҚШ –та 20 мың сатанист бар» дейді. «Олар жылына 50-60 мың баланың қанын ішеді» дейді, ФБР-дің бұрынғы директоры Тед Голдерман.

                                              ххх

Жаңа заман, сөз өнерін қыспағына қысты алып, ұзын-сонар сөз назардан тыс қалып, айналғанда, алға шықты, қысқалық пен нұсқалық.

                                         ххх

Шын ақындар трактат жазбаған философтар.

Ал шын философтар өлең жазбаған ақындар.

                                        ххх  

Ойы байдың тілі бай, тілі байдың ойы бай. Бірінсіз бірі жоқ.   

                                        ххх                        

Адамзат прогреске табынып, яғни өз-өзіне табынып 19 ғасырда Құдайды «өлтіріп», 20 ғасырда екі рет дүниежүзілік соғыс жасады. Өзін-өзі өлтіруге кірісті. Құдайсыз адамзат енді мына жаңа ғасырда қаруға табынып, Жер бетінен адамзатты біржола жою жолында жүр.