Қошанов мектептердегі орыс тілі сағаттарын қысқарту туралы ұсынысқа қатысты пікір білдірді

Қошанов мектептердегі орыс тілі сағаттарын қысқарту туралы ұсынысқа қатысты пікір білдірді.

Мәжіліс алаңында журналистер Ерлан Қошановтан мәжілісмен Ринат Зайытовтың қазақ мектептерінде орыс тілін оқыту сағаттарын қысқарту қажет деген сөзіне түсінік беруді сұрады.

«Мәселеге бұлай қарамау керек. Мәжілісте әртүрлі пікірдегі депутаттар жиналды. Олар өз пікірлерін айтады, біз оларға тыйым сала алмаймыз. Орыс тіліне тыйым саламыз, әлде мемлекеттік тілді дамытамыз ба? Қазақстан халқы ретінде біздер көп тілді білсек, балаларымыз, ұрпақтарымыз және өзіміз басқа елдердің тұрғындарынан бір саты жоғары боламыз», — деді Қошанов.

«Қазақстанға орыс тілі керек пе?» деген сұраққа Мәжіліс төрағасы мемлекеттік тілге, яғни қазақ тіліне басымдық берілгенін айтты. Дегенмен, басқа тілдерді үйренуге ешқандай кедергі жоқ.

»Орыс тілі де, ағылшын тілі де талап етіледі. Дегенмен, бірінші кезекте мемлекеттік тілге басымдық беріледі. Сондықтан мектеп бітірген балаларымыз мемлекеттік тілді жетік меңгеруі керек. Басқа тілдерді үйренуге еш кедергі жоқ. Біз басқа тілдерді оқытуды қысқарту арқылы мемлекеттік тіл мәселесін шешпеу керек. Бәрін дамыту керек. Бірақ мемлекеттік тілге басымдық беру керек», — деп жауап берді ол.

Бұған дейін Евгений Бобров ресейлік БАҚ өкілдеріне берген сұхбатында Қазақстанда орыс тілінің қолданысы төмендегенін мәлімдеген болатын. Қазақстан Сыртқы істер министрлігі өз кезегінде: «Мүмкін бұл адам біздің елдегі барлық жағдайдан хабарсыз шығарн» деп жауап берді.