Ресейде дауыл кезінде лагерьді ағаш басып қалды. Сегіз адам қаза тапты

Бұл туралы Йошкар-Ола мэрі Евгений Маслов хабарлады. Оның айтуынша, боран салдарынан 10 адам ауруханаға жеткізілді, олардың екеуі ауыр халде. Бұған дейін ФВВ  Ялчик көліндегі дауылдан жеті адам қаза тауып, 20 адам жараланғанын хабарлаған.

«Марий Эл» басшысы Юрий Зайцевтің хабарлауынша, Ялчик көлінің жағасындағы шатыр тігілген лагерьге ағаштар құлаған. Оның айтуынша, зардап құрбандар арасында үш бала бар. ФВВ мәліметінше, туристер тобы құтқару қызметтерінде тіркелмеген.

«Подъем» басылымы құтқарушыларға сілтеме жасап, оқиға кезінде Ялчик көлінің жағасындағы лагерьде 500-ге жуық көлік болғанын жазады. Дауыл басталғанда көптеген адам орманнан шығуға тырысқанымен, құлаған ағаштар шығуға жол бермеген. Куәгерлердің айтуынша, құлаған ағаштардың астында қалмас үшін әйелдер мен балаларды жағажайға алып шыққан.

29 шілдеде дауыл Приволжск (Еділ) федералды округінің сегіз аймағында, оның ішінде Марий Элде байқалды. Желдің жылдамдығы секундына 27 метрге жетті. ФВВ мәліметінше, 100 мыңға жуық адам тұратын ауданда 550-ден астам ағаш құлап, 41 үй мен жеті әлеуметтік нысанның шатыры зақымданған.Дауыл салдарынан федералды округте тоғыз адам қаза тауып, 65-тен астам адам жарақат алған. Татарстанда туристер шатырына ағаш құлап, бір бала қаза тапқан.