Ресей 2026 жылдың басынан бері Украина энергетикасына 217 рет шабуыл жасаған

Бұл туралы энергетика саласындағы төтенше жағдай бойынша өткен жиынның қорытындысында Украина Премьер-министрі Юлия Свириденко мәлімдеді.

Украина Президенті Владимир Зеленский қазіргі таңда ең күрделі жағдай Киев пен Харьков қалаларында және олардың облыстарында, сондай-ақ Сумы мен Полтава облыстарында қалып отырғанын айтты.

«Орталық Украинаның өзге өңірлерінде де жағдай ауыр, соның ішінде Днепропетровск пен Черкассы облыстарында», – деді Зеленский.

Зеленскийдің айтуынша, Ресейдің бірінен кейін бірі жасалған соққыларынан кейін Киевтің бірнеше ауданында 1100-ден астам көпқабатты тұрғын үй әлі күнге дейін жылусыз отыр.

«Әрбір осындай үй бойынша жылуды қалпына келтіру мерзімі, тұрғындардың жылыну мүмкіндіктері және қажетті қолдау шаралары туралы нақты ақпарат болуы тиіс», – деп атап өтті ол.

Президент сондай-ақ қазір Украина астанасында 200-ден астам апаттық бригада жұмыс істеп жатқанын жеткізді. Ал Энергетика министрлігі қызметкерлерді алмастырып жұмыс істеу (ротация) үшін бригадалар санын арттыруға уәде берген, себебі мамандар қатты шаршаған.

Зеленский Премьер-министрге ел бойынша азаматтарға көрсетілетін қосымша көмектің «қажетті көлемдері» жөнінде «нақты мәліметтерді» жедел түрде дайындауды тапсырды.

Юлия Свириденкoның айтуынша, энергетикалық дағдарысқа байланысты енгізілген жедел шаралар аясында 9000-нан астам жеке кәсіпкер апатты ажыратулар кезінде автономды жұмыс істеу үшін 15 мың гривнаға дейінгі біржолғы мемлекеттік көмекке өтініш берген.