Ресей италиялық мафияға қару жеткізеді - БАҚ

 Журналистердің айтуынша, Тула қару-жарақ зауытынан шыққан сериялық нөмірсіз жаңа қарулар Жерорта теңізі порттары арқылы италиялық мафия қолына түсіп отыр. Олар бөшкелерге құйылған май, отын не техникалық сұйықтық ішінде жасырылып, ресейлік «көлеңкелі флот» кемелерімен тасымалданады.

Linkiesta дерегіне қарағанда, бұл қарулар зауыттан-ақ нөмірсіз шығарылған. Демек, мұндай операциялар  мемлекеттің рұқсатынсыз мүмкін емес. Журналистердің айтуынша, бұл – билік пен қылмыстық топтар арасындағы «қызыл сызық» бұзылғанын аңғартатын белгі.

Италия Сенаты дереу реакция білдіріп, ішкі істер министріне сауал жолдады. Парламент депутаттары нақты деректерді растауды, Сицилия порттарындағы күдікті тасымалдарды тексеруді және «қоймада жиналып жатқан» қару партиялары туралы мәліметтерді сұрады.

Бұл айыптаулар халықаралық деңгейде де алаң туғызды. Өйткені Еуропадағы заңсыз қару нарығы бұрыннан басты қауіптердің бірі саналады. Еуропол өз баяндамаларында сериялық нөмірі өшірілген немесе қайта жасалған қаруларды жиі атап өтеді. Бірақ дәл заводтан-ақ нөмірсіз шыққан жаңа қару – аса қауіпті құбылыс.

Көлеңкелі флот феномені

Ресейдің санкциядан жалтару үшін құрған «көлеңкелі флоты» әлемдік сарапшылардың назарында. Әдетте мұндай кеме тізбегі мұнай тасымалдауға қолданылады. Бірақ соңғы зерттеулер қару-жарақ пен оқ-дәрілердің де жасырын жеткізілуі мүмкін екенін айтады. Бұл – геосаяси ойындардағы жаңа тактика.

Ресми органдар не дейді?

Проблеманың барын ешкім жоққа шығармайды. БҰҰ мен Еуропол заңсыз қару саудасының арналарын үнемі талдап келеді. Олар Балқан қоймаларынан шыққан ескі қаруларды, конверсияланған үлгілерді және «ghost guns» құбылысын атайды. Бірақ әзірге ресми есептерде Ресейден Италияға нөмірсіз жаңа қару жеткізу жөнінде нақты дәлелдер жоқ.

Бұл жерде саясат пен қылмыстың түйіскен тұсы анық байқалады. Журналистік зерттеу айыптау деңгейінде тұр, ал ресми дәлел – прокуратура мен халықаралық тергеулердің құзырында.

Бұл оқиға бірнеше стратегиялық тәуекелді көрсетеді:

Еуропа қауіпсіздігі – заңсыз қарудың көбеюі мафия мен терроризм қаупін арттырады.

Ресейдің санкциядан жалтаруы – көлеңкелі флот тек экономика емес, қауіпсіздікке де қатер төндіріп тұр.

Саяси сенім дағдарысы – егер айыптаулар расталса, Мәскеудің халықаралық беделі одан әрі құлдырайды.

Linkiesta жариялаған деректер ресми деңгейде расталған жоқ.