Ресей, Қытай және Иран бірлескен теңіз жаттығуларын бастады

Қытай Қорғаныс министрлігі «Теңіз қауіпсіздік белдеуі 2025» жаттығулары «әскери сенім мен прагматикалық ынтымақтастықты нығайтуға» бағытталғанын айтты.

Осыған дейін үш ел арасында соңғы уақытта тереңдей түскен ынтымақтастық пен әлеуеттің артып келе жатқанын атап өткен ұқсас іс-шаралар 2019, 2022, 2023 және 2024 жылдары өткен болатын. Бұған қоса, Қытай мен Ресей әскери-теңіз күштері Тынық мұхитында немесе Оңтүстік Африка жағалауы сияқты шалғай жерлерде бірлескен жауынгерлік жаттығуларды жиі ұйымдастырады. Ал Украинаға басып кіруін жалғастырып жатқан Ресей мен Иран қаңтар айында қорғаныс және сауда сияқты салаларда ынтымақтастықты нығайту туралы келісімге қол қойды.

Бұл оқу-жаттығулар Қытай, Иран және Америка Құрама Штаттары арасындағы шиеленістің күшеюі тұсында да өтуде. Қытай мен АҚШ арасындағы кикілжің, ең алдымен, Бейжің өз территориясы деп санайтын және бұрыннан басып алуға қауіп төніп тұрған Тайвань төңірегіндегі жағдайға байланысты. Америка Құрама Штаттары көптеген жылдар бойы Тайваньның ең ірі әскери демеушісі болды.

Ресей Қорғаныс министрлігі «Теңіз қауіпсіздік белдеуі 2025» оқу-жаттығуларының мақсатының теңіз қауіпсіздігін қамтамасыз ету және теңіз қатынасын қорғау екенін мәлімдеді. Департамент жалпы саны 15-ке жуық кемелер, көмекші кемелер мен жауынгерлік катерлер, сондай-ақ әскери-теңіз авиациясының тікұшақтары тартылатынын айтты.