Ресей мен Киев делегациялары Женевадан ұшып кетер алдында тағы бір рет кездесті

Ресей мен Украина делегациялары Женевада Украинадағы соғысты тоқтату жөніндегі консультациялардың ресми бөлігі аяқталған соң екіжақты тікелей келіссөздердің тағы бір раундын өткізді. Ресей делегациясының басшысы Владимир Мединский сәрсенбі, 18 ақпанда, ұшып кетер алдында Киев өкілдерімен жабық есік жағдайында кездескенін растады. Алайда ол әңгіменің мазмұнын ашып айтпады.

Қосымша кездесу өткенін Украинаның «Суспільне» басылымы да растады. Ол Украина делегациясының басшысы – Ұлттық қауіпсіздік және қорғаныс кеңесінің хатшысы Рустем Умеровтің баспасөз хатшысы Диана Давитянға сілтеме жасаған. Давитянның айтуынша, шамамен бір жарым сағатқа созылған кездесуге Умеров пен Мединскийден бөлек, Жоғарғы рададағы «Халық қызметшісі» фракциясының жетекшісі Давид Арахамия қатысқан. Басылым тілшісінің хабарлауынша, ол InterContinental қонақүйі алдында кездесуден шығып бара жатқан Мединскийді көрген.

Өз кезегінде Украина президентінің коммуникациялар жөніндегі кеңесшісі Дмитрий Литвин журналистерге Украина өкілдерінің Мединскиймен кездесуін «ешқандай ерекше формат» деп бағаламау керегін айтты. Оның түсіндіруінше, «дәл сол адам» қосымша кездесуді өзі ұсынған және бұған дейін талқыланған мәселелер бойынша кейбір нақтылаулар ғана жасалған.

«Ешқандай ерекше нәрсе жоқ. Делегация келіссөздердің нәтижелері туралы Киевте Президентке толық есеп береді және біз бұл жөнінде хабарлаймыз», – деді Литвин.

Оның айтуынша, Ресей делегациясының басшысы Украина өкілдеріне жүгінген кезде украин делегациясының бір бөлігі кетіп қалған. Кейін Мединскиймен Умеров пен Арахамияның сөйлесуіне шешім қабылданған.

«Бұл жоспарланған кездесу емес еді, ақыр соңында мазмұндық тұрғыда айтарлықтай ештеңе болған жоқ. Мединскийді болмаған адамға айналдырмаңыздар – оны қандай да бір ерекше немесе параллель формат жүргізіп жатқан тұлға ретінде көрсетудің қажеті жоқ», – деп атап өтті Зеленскийдің кеңесшісі

Бұған дейін АҚШ-тың арағайындығымен өткен екі күндік келіссөздердің қорытындысы бойынша Ресей мен Украина делегациялары елеулі нәтижеге қол жеткізбегені хабарланған. Мединский келіссөздерді «қиын, бірақ іскерлік сипатта өтті» деп бағалаған. Ал Умеров кейбір мәселелерге айқындық енгізілгенін айтқанымен, «бұл кезеңде егжей-тегжейін жариялауға болмайды» деп мәлімдеген.