Ресей Молдованың үш дипломатын елден шығарды

Мәскеудегі Молдова елшілігінің үш қызметкері персона нон грата деп жарияланып, Ресей аумағынан кетуге міндетті.  Молдованың Ресей Федерациясындағы елшісі Лилиан Дариге тиісті нота тапсырылды. Ресей Сыртқы істер министрлігі бұл шара үш ресейлік дипломаттың Кишиневтен шығарылуына жауап ретінде қабылданғанын хабарлады.

 Молдова Сыртқы істер министрлігі Кишиневтегі Ресей елшілігінің үш қызметкерін «дипломатиялық мәртебеге сәйкес келмейтін әрекеті үшін» елден шығаруға бұйрық берді. Молдова билігі Ресей елшілігін ресейшіл депутат Александр Нестеровскийге сыбайлас жемқорлық пен саяси партияларды заңсыз қаржыландырды деген айыппен  Приднестровьеге қашуға көмектесті деп айыптады.

Молдова барлау қызметінің мәліметінше, Нестеровский Ресей елшілігінің ғимаратын паналаған, содан кейін оны дипломатиялық нөмірлері бар көлікпен Приднестровьеге алып кеткен. Ресей Сыртқы істер министрлігі бұл айыптауларды жоққа шығарды. «Ресей дипломатиялық миссиясын Молдова Республикасының ішкі істеріне араласты деп айыптау әрекеттері мүлдем негізсіз», - делінген Ресей дипломатиялық миссиясының мәлімдемесінде.

Молдова мен Ресей арасындағы қарым-қатынас Ресейдің Украинаға кең ауқымды басып кіруінің басынан бері өте шиеленіскен күйінде қалды. Соңғы жылдары екі ел де бір-бірінің ондаған дипломатын елден шығарды, деп хабарлайды Франс Пресс. Кишинев Кремльді елдің ішкі саясатына, соның ішінде Молдовадағы сайлау нәтижелеріне араласты деп бірнеше рет айыптады.