Ресей Ямпольге шабуыл жасап жатыр: бұл ауыл Донбасс солтүстігінің қорғанысы үшін қаншалықты маңызды?

Ямполь үшін шайқас

ВВС-дің жазуынша, 13 қыркүйек күні түстен кейін Украина Қарулы күштерінің 11-армия корпусы ресейліктердің Ямпольге кіргенін мәлімдеген.

Әскери ақпаратқа қарағанда, ресейлік әскерилер халықаралық гуманитарлық құқықты өрескел бұзып, бейбіт тұрғын киімін киіп, ауылға жасырын кірген. Олар үйлер мен жертөлелерге орналасуға тырысқан.

«Днипро» әскери-оперативтік тобының өкілі, подполковник Алексей Бельскийдің айтуынша, кейбір жергілікті тұрғындар ресейліктерге көмектескен. Бұл украин қорғанысы үшін қарсы шаралар қолдануды қиындатқан.

Соған қарамастан, Украина басшылығы ауылға кірген ресейліктердің бір бөлігі жойылып, кейбірі тұтқынға түскенін хабарлады. Бірақ жағдайдың тұрақсыз екені байқалады.

24-ші «Айдар» штурм батальонының командирі Станислав Бунятов 16 қыркүйекте:
«Ямпольде жағдай нашарлады, жау ауылға басып кіріп, резервтерін тартып жатыр. Шайқастар жалғасуда, бүкіл бағыт бойынша ахуал қиын», – деп жазды.

DeepState OSINT жобасының картасына сәйкес, 17 қыркүйекке қарай ауылдың солтүстік-шығыс бөлігі «сұр аймаққа» айналған, яғни қақтығыстар белсенді жүріп жатыр.

Ямполь неге маңызды?

Ауылдың өзі шағын (шамамен 4 шаршы шақырым) әрі қазір негізінен қаңырап бос қалған (соғысқа дейін шамамен 400 тұрғыны болған). Бірақ ол Донецк облысының солтүстігіндегі алдағы оқиғаларға үлкен әсер етуі мүмкін.

Подполковник Бельскийдің айтуынша, ауылды басып алу ресейліктерге Лиманға немесе Славянск бағытына жол ашуы ықтимал. Славянск-Краматорск агломерациясына дейін Ямпольден бар-жоғы 20 шақырым шамасында.

Сонымен қатар, ауылдың маңынан Северск – Лиман трассасы өтеді. Бұл жолдар украин бөлімшелерін логистикамен қамтамасыз ету үшін маңызды. Сарапшылардың пікірінше, соңғы апталарда Ресей дәл осы бағытта қысымды күшейткен.

Дегенмен, Бельскийдің айтуынша, Ямпольды жоғалту украин әскерінің толық логистикасына қауіп төндірмейді, себебі басқа да жолдар бар. Бірақ солтүстіктегі Северск қаласына тікелей қауіп күшейгені анық.

Северск пен Лиман үшін қатер

Ұзақ уақыт бойы Северск маңындағы плацдарм майданның салыстырмалы түрде тыныш учаскесі саналып келген. Бірақ 2025 жылдың мамырынан бастап ресейліктер маңызды бекініс – Белогоровканы басып алып, кейін Серебрян орманына қарай ілгеріледі.

Қыркүйекке қарай олар орманның көп бөлігін бақылауға алған. Ресей шағын топтармен ғана емес, бронетехникамен де шабуылдауда. DeepState картасы бойынша қақтығыстар аймағы қазір Северск шетіне дейін жетіп отыр.

Осыған қарамастан, Украина Бас штабы ресейліктердің Северск қаласына тікелей кіргенін жоққа шығарады. Қала қирап біткенімен, Донбасс солтүстігінде маңызды қорғаныс орталығы болып қала беруде.

Осыған ұқсас жағдай Лиман маңында да байқалады. Ресей әлі қалаға жете алған жоқ, бірақ логистиканы үзуді көздеп, Шандриголово, Колодези және Заречное ауылдарына шабуыл жасап жатыр.

Украина штабының мәліметінше, соңғы апталарда ең көп қақтығыстар Покровск бағытынан кейін дәл осы Лиман және Северск маңында тіркелуген.

Ямполь – өзі шағын ауыл болғанымен, Солтүстік Донец бойындағы стратегиялық түйін саналады. Оның құлауы Северск үшін тікелей шайқастардың басталуына әкелуі мүмкін. Ал Лиман мен Северск плацдармдарының жоғалуы Кремльге күзгі негізгі нысан – Славянск пен Краматорскке жол ашып береді.