Ресей зымыраны Иранның үш жасанды серігін ғарышқа шығарды

Бұл туралы Reuters агенттігі хабарлады.

Ұшырылым Ресейдің Қиыр Шығысындағы Восточный ғарыш айлағынан жүзеге асқан. Иран тарапының мәлімдеуінше, аталған серіктер ауыл шаруашылығына қажет экологиялық деректерді жинауға және табиғи апаттарды бақылауға арналған.

DPA агенттігі еске салғандай, Иран бұған дейін де бірнеше жасанды серікті ғарышқа ұшырған. Тегеран бұл бағдарламаның тек бейбіт мақсаттарды көздейтінін және әскери қолдануға арналмағанын айтады.

Иранның сыртқы істер министрі Аббас Аракчи  ұшырылымды «таза ғылыми миссия» деп атап, «Иран тек өз технологияларын дамытып жатыр, ал жасанды серік ұшыру – сол процестің бір бөлігі» деді.

Сонымен бірге Израиль мен бірқатар Батыс елдері, соның ішінде АҚШ, Иранның ғарыштық бағдарламасына сын көзбен қарайды. Оларда Тегеранның ғарыш технологияларын әскери мақсатта пайдалануы мүмкін деген алаңдаушылық бар. 

Сын айтушылар бағдарламаларға әскери құрылымдардың, соның ішінде Ислам революциясы сақшылар корпусының қатысуын да алға тартады.