Жазылу
Ресейде Қазақстандағы банк тонауына күдікті төрт адам қамауға алынды
Иваново қаласының соты Павлодардағы Halyk Bank бөлімшесін тонау ісі бойынша күдікті ретінде танылған Ресейдің үш азаматын қамауға алып, тағы біреуін үйқамаққа жіберді.
Бұл туралы РИА Новости сот материалдарына сілтеме жасап хабарлады.
Құжаттарға сәйкес, қылмыстық іс 2024 жылғы 11 қарашада Павлодар қаласының Орталық полиция бөлімі тарапынан қозғалған. Тергеу нұсқасы бойынша, 11 қарашаға қараған түні белгісіз адамдар банк бөлімшесіне қабырғаны бұзып кіріп, депозитарийден ақша мен зергерлік бұйымдарды алып кеткен.
Материалдарда келтірілген мәліметке сәйкес, келтірілген шығын әртүрлі валютада шамамен 400 млн рубльге бағаланған. Жәбірленушілер ретінде Қазақстанның 23 азаматы көрсетілген.
Күдіктілерге аса ірі мөлшерде, ұйымдасқан топ құрамында жасалған ұрлық бойынша айып тағылған.
Сонымен қатар, айыпталушылардың бірінің адвокаты оның және басқа да күдіктілердің қылмысқа қатысы жоқ екенін мәлімдеді. Оның айтуынша, олар Павлодарға автокөліктер сатып алып, кейін Ресейде қайта сату мақсатында барған.
Материалдарға қарағанда, тергеу аясында Ресей мен Қазақстанның құқық қорғау органдары өзара іс-қимыл жүргізіп жатыр.
Еске салсақ, 2024 жылғы 11 қараша күні таңертең Павлодардағы банк бөлімшесінде қабырғаның бұзылғаны анықталған. 2025 жылғы ақпанда күдіктілердің Ресейде ұсталғаны хабарланған, ал 2026 жылғы қаңтарда істің Ресей сотында қаралатыны белгілі болған.
