Ресейден тағы 11 украин баласы еліне қайтарылды

 Бұл туралы Украина президенті кеңсесінің басшысы Андрей Ермак Telegram-арнасында жазды.

Ермактың айтуынша, қайтарылғандардың қатарында 10 және 12 жастағы ағайынды ұлдар бар. Олардың әкесі украин ұстанымдары үшін азапталып, содан қаза тапқан. Осыдан кейін аналары балаларын алып, уақытша оккупацияланған аймақтан кетуге бел буған. Сонымен қатар, екі жасар сәби бар жүкті әйел де эвакуацияланған. Әйел Ресей азаматтығын алудан үзілді-кесілді бас тартқан және бұл шешімі салдарынан өз бетінше кетуге мүмкіндік болмаған. Украина бақылауындағы аймаққа жеткеннен кейін, ол екінші баласын дүниеге әкелген.

Жалпы қайтарылған балалардың жасы 2 мен 17 жас аралығында. Бұл ақпарат «Bring Kids Back UA» онлайн платформасында да расталды.

1,6 миллион бала – Ресей бақылауында

Украина билігінің мәліметінше, Ресей жаулап алған аймақтарда және Ресейдің өзінде 1,6 миллионнан астам украин баласы қалып қойған. Олардың басым бөлігі күшпен көшірілген немесе мәжбүрлі түрде Ресей азаматы болып тіркелген. БҰҰ мен халықаралық құқық қорғау ұйымдары бұл әрекеттерді «мәжбүрлі депортация» және «халықаралық құқықты өрескел бұзу» деп бағалап отыр.

2023 жылы Халықаралық қылмыстық сот Ресей президенті Владимир Путин мен балалар жөніндегі омбудсмен Мария Львова-Белованы украин балаларын заңсыз алып кетуге байланысты әскери қылмыс жасады деп айыптап, олардың атына ордер шығарған болатын.

Украина балалары – соғыс құрбаны

Ресей-Украина соғысы басталғалы бері Украинада мыңдаған бала түрлі қасіретке ұшырады. ЮНИСЕФ пен Save the Children сынды халықаралық ұйымдар балалардың басына түскен қиындықтар туралы дабыл қағуда: олар соғыс аймағында қалып, білімсіз, медициналық көмексіз, кей жағдайда ата-анасыз өмір сүруге мәжбүр.