Ресейдің Киев пен Киев облысына шабуылынан алты адам қаза тапты

Киев облысының Белоцерковск ауданында 23 маусымға қараған түні Ресейдің Украина астанасы мен облысына жасаған шабуылы салдарынан кем дегенде бір адам қаза тапты. Бұл туралы Киев облыстық әскери басқармасының басшысы Николай Калашник Telegram желісінде хабарлады.

«Өкінішке қарай, жаудың шабуылы салдарынан Белоцерковск ауданында 1957 жылы туған әйел алған жарақатынан қаза тапты», - делінген хабарламада.

Сонымен қатар, Белоцерков ауданында жеке үйлер мен көпқабатты тұрғын үй зақымданды, медициналық мекеме орналасқан қонақүй ғимараты қирады.

Борисполь ауданында екі жеке үйде өрт шыққан. Буча ауданында төрт жеке ғимарат пен үш көлік зардап шеккен.

Украина астанасының мэрі Виталий Кличконың айтуынша, Киевке жасалған шабуылдан бес адам қаза тауып, 19-ы жараланған. 10 адам, оның ішінде екі бала мен жүкті әйел құтқарылған.

Украина баспасөзінің хабарлауынша, Ресей Украинаға пилотсыз ұшақтар, баллистикалық және қанатты зымырандар арқылы түні бойы шабуыл жасаған. Бұл ретте ресейлік пилотсыз ұшақтар мен зымырандардың негізгі аймақтарының бірі Киев пен Киев облысы болған.

Киев қалалық әскери басқармасы  мен қала мэрі Виталий Кличконың хабарлауынша, Ресей Федерациясының Святошин ауданында түнгі шабуылы салдарынан 56 және 61 жастағы екі ер адам жарақат алған. Олар ауруханаға жатқызылған. 

Украина астанасының Шевченко ауданында бес қабатты ғимараттың кіреберісі қирап қалған. Үйінді астында адамдар болуы мүмкін деген болжам бар. Оқиға орнында төтенше жағдайлар қызметі жұмыс істеп жатыр.

Киевтің кейбір аудандарында өрт шығып, көліктер мен азаматтық инфрақұрылым зардап шеккен. Атап айтқанда, Соломен ауданында бизнес орталығы мен білім беру мекемесі қираған. Дарницкий ауданында  екі қабатты тұрғын үй зақымданған. Деснян ауданында жарылыс салдарынан тұрғын үйдің ауласында кратер пайда болған. Холосеев ауданында екі көлік пен бизнес орталығы қираған.