Руслан Берденов Шымкент әкімінің орынбасары қызметінен кетті

Шымкент қаласы әкімдігінің баспасөз қызметі Руслан Берденовтің қала әкімінің орынбасары қызметінен босатылғанын хабарлады.

Әкімдіктің мәліметінше, Берденов бұл қызметтен өз еркімен кеткен. Ол аталған лауазымға 2025 жылдың ақпан айында тағайындалған еді.

Еске сала кетейік, 2025 жылдың 21 сәуірі кешке Берденовке әкімдік ғимаратынан шыққан сәтте аңшы мылтығынан бес рет оқ атылған еді. Қастандық жасаған – қалалық әкімдікке қарасты «Тұрғын үй Шымкент» ЖШС-ның бұрынғы басшысы Ернар Жиембай екені анықталды.

Сотта жауап берген ол өз кінәсін жартылай мойындап, адам өлтіру ниеті болмағанын, тек қорқытқысы келгенін айтты. Ол шабуылға қызғаныш себеп болғанын, алайда жағдайдың түп-тамырында өзіне Берденов тарапынан жасалған моральдық қысым мен қорлау әрекеттері жатқанын жеткізді.

Айыпталушының сөзінше, Берденов оны бірнеше рет көпшілік алдында кемсіткен. Бірде ол: «Түрің не болып кеткен, шашың да түсіп қалыпты, сен қайдан шықтың» деп, намысына тиген. Тағы бірде, жұбайы туралы да анайы сөздер айтып, әлеуметтік желіде әйелінің суреттеріне «лайк» басқан. Е.Жиембай бұл сөздерден кейін өзін қатты қорланғандай сезінген. Ол ерекше күтімді қажет ететін баласы, онкологиялық дертке шалдыққан әкесі және жақында ажырасқан әпкесі бар екенін айтты. Жұбайымен болған жанжал жығылған үстіне жұдырық болған. Келесі күні Е.Жиембай ажырасуға арыз берген. Ал 21 сәуір күні әкімдік ғимаратына келіп, Берденовке оқ атқан.

Сот процесі кезіндеқала әкімі Ғабит Сыздықбековтің де аты аталды. Е.Жиембайдың сөзінше, Берденов одан қазіргі Шымкент әкімі Ғабит Сыздықбековке жала жауып, «қастандықтың тапсырыс берушісі» ретінде көрсетуін талап еткен. «Берденов маған «егер сотта сені жалдамалы кісі өлтіруші ретінде Сыздықбеков жұмсады деп айтсаң, мен сені кешіремін» деді», – дейді айыпталушы. Айыпталушының бұл сөзі сот залын ғана емес, жалпы қоғамдық ортаны да дүр сілкіндірді. Қала әкімінің атының аталуы істің артында ірі саяси ойындар бар деген болжамдарды күшейте түсті. Кей телеграм арналар Ернар Жиембайдың бұл сөзін жариялап, артынан өшіріп тастады.

Сот үкімі

Кейін сот «Тұрғын үй Шымкент» ЖШС-нің бұрынғы директоры Ернар Жиембайды Берденовке жасалған шабуылға кінәлі деп таныды. Ол орта қауіпсіздік деңгейіндегі колонияда 9 жылға бас бостандығынан айырылды.