Шет ауданында мал қырылуда

Ветеринарлар сиырда инфекциялық сипаттағы ауру белгілері байқалғанын мәлімдеді.

Сырқат таралған Ақшоқы ауылында соңғы дерек бойынша 260 бас сиыр індет жұқтырып, 82 бас сиыр өлген. Өлген ірі-қараның ішінде басым бөлігі бұзаулар болып шықты. Ірі-қараны сұлатқан қандай кесел екенін анықтау мақсатында ветеринарлар сынамалар алып, ҚР Ауыл шаруашылығы министрлігі Ветеринариялық бақылау және қадағалау комитетінің республикалық ветеринариялық зертханасына жіберді.«Малдың өлекселері инсинератор арқылы өртеу жолымен жойылды. Жою жұмыстары ауылдық округке тиесілі ескі мал қорымының аумағында, мүдделі мемлекеттік органдардың, аудандық ветеринариялық станса мамандарының қатысуымен жүргізілді. Мал дәрігерлері мал иелерімен бірлесіп, ауырған жануарларға симптоматикалық емдеу шараларын жүргізуде», – деп хабарлады Қарағанды облысының ветеринария басқармасы.Ақшоқы ауылының кіреберісіне дезинфекция жасайтын қондырғысы бар бекет орнатылған. Ветеринарлар індет жұқтырған малдардың ауруға қарсы қолданылатын вакцинамен егілмегенін айтады. Вакцина Ресей мен Украинадан жеткізілетіндіктен, қазіргі уақытта дәрі-дәрмекті тасымалдау тоқтап тұр. Бұған екі ел арасындағы шиеленіскен соғыс жағдайы себеп болып отыр. Ал мұндай екпені елімізде өндірмейді.  Осылайша, көрші елдегі соғыс адам түгілі малға да кесапатын тигізіп тұр.