Жазылу
Шымкентте 50 шенеунік құмар ойын ойнап, 757 млн теңгеге ұтылған
Шымкентте 50 мемлекеттік қызметкер құмар ойындарға қатысқаны үшін жұмысынан айырылуы мүмкін.
Қалалық прокуратураның тапсырмасымен жергілікті атқарушы органдарда талдау жүргізілген. Нәтижесінде соңғы бір жылда бірқатар шенеуніктің букмекерлік кеңселерге белсенді түрде ақша аударғаны анықталды – жалпы сома 400 миллион теңгеден асып кеткен.
Мемлекеттік қызметкерлердің құмар ойындарға әуестігі – жай ғана жеке мәселе емес. Бұл – сыбайлас жемқорлыққа қарсы заңнама мен этикалық кодексті тікелей бұзу болып есептеледі. 2024 жылы Қазақстанда шенеуніктерге құмар ойындардың кез келген түріне, соның ішінде онлайн-бәс тігуге тыйым салатын заң күшіне енді. Алайда Шымкенттегі мемлекеттік мекемелерде жұмыс істейтін 50 қызметкер бұл тыйымды елемеген.
Шымкент қаласы прокуратурасы басқарма бастығының орынбасары Бегжан Құлатаев:
«Прокуратура жергілікті атқарушы органдардың қызметкерлері арасында талдау жүргізді. Нәтижесінде 161 адамның Olimpbet онлайн платформасы арқылы бәс тіккені анықталды. Оның 50-і – жаңа заң күшіне енгеннен кейін. Жалпы бәс тіккен сома – 443 миллион теңге», - деді.
Ірі ұтысқа кенелгісі келген әрекет – қызметтен айырылумен аяқталуы мүмкін. Прокуратура қадағалау актісін енгізді, ал мемлекеттік қызметкерлердің әрекеттері енді тәртіптік комиссияларда қаралуда. Заңда жаза түрлері нақты көрсетілген.
Бегжан Құлатаев, Шымкент қаласы прокуратурасы басқарма бастығының орынбасары:
«Жаңа сыбайлас жемқорлыққа қарсы нормаларға сәйкес, интернет арқылы құмар ойындарға қатысу – еңбек шартын бұзу үшін негіз болып саналады. Бұл шешім құқықтық статистика органдарында тіркелуге тиіс және өзге де тәртіптік шараларға әкеп соғуы мүмкін», - деді.
2024 жылдың басынан бері прокуратураның мәліметінше, Шымкенттегі мемлекеттік органдардың 161 қызметкері онлайн-бәс тігуге 757 миллион теңге жұмсаған. Бұл сома бойынша шенеуніктердің ресми табысын ескерсек, біраз сұрақ туғызады. Аталған қаражаттың қайдан келгені әзірге белгісіз. Ал олар тәуелділікпен күресе ала ма – ол да ашық сұрақ.
Айта кетейік, Қазақстан азаматтары eGov Mobile мобильді қосымшасы арқылы өздеріне құмар ойындар мен бәс тігуге шектеу қоюға құқылы. Шектеу мерзімі – 10 жылға дейін.
