Шымкенттік оқушылар World Robot Olympiad жарысында топ жарды

Жеңімпаздарды туған қаласында ерекше құрметпен қарсы алды. Шәкірттердің табысын бөлісу үшін әуежайға ата-аналар, ұстаздар мен достары жиналды. Жастардың қуанышын бірге көрген жұрт олардың еңбегіне лайықты қошемет көрсетті.

World Robot Olympiad (WRO) – робототехника саласындағы ең беделді халықаралық олимпиадалардың бірі. Әлемнің 90-нан астам елінде ұйымдастырылатын бұл додада мыңдаған жас талант өз өнертабыстарын таныстырып, болашақ технологияларына үлес қосуда. Әр елде ұлттық іріктеу кезеңдері өтіп, үздік шыққан командалар әлемдік финалда бақ сынайды. Биылғы финал Сингапурда өтеді. Шымкенттік оқушылар енді Қазақстан атынан әлем сахнасында өнер көрсетеді.

Кейінгі жылдары шымкенттік жасөспірімдер білім мен ғылым саласындағы түрлі жарыстарда тұрақты түрде жоғары нәтижелер көрсетіп жүр. Робототехникадан бөлек, қала мектептерінің командалары республикалық инновациялық жобалар байқауларында, IT-форумдарда және хакатондарда жүлделі орындарға ие болды. Мәселен, 2024 жылы шымкенттік жас өнертапқыштар елімізде өткен KazRoboSport чемпионатында бірнеше алтын мен күміс жүлдені жеңіп алған болатын.

Мұндай жеңістер – оқушылардың табандылығы мен ізденісінің, сондай-ақ ұстаздар мен тәлімгерлердің қажырлы еңбегінің жемісі. Жас өнертапқыштардың жетістігі Шымкент қаласының білім беру жүйесінің дамып келе жатқанын көрсетіп, болашақта отандық ғылым мен технология саласының өркендеуіне жол ашары сөзсіз. Алдағы уақытта шымкенттік дарынды жастар халықаралық додаларда Қазақстанның атын тағы да асқақтатуға ниетті.

Сондай-ақ жалпы Қазақстан жастары да кейінгі жылдары халықаралық деңгейде айтарлықтай табыстарға қол жеткізді. 2023 жылы еліміздің командасы Германияда өткен WRO әлемдік финалында үздік ондыққа енді. Ал қазақстандық оқушылар 2022 жылы Даниядағы олимпиадада да жүлделі орынға жақын нәтижелер көрсеткен еді. Бұған қоса, қазақстандық балалардың халықаралық математика, физика және информатика олимпиадаларындағы жетістіктері әлемге белгілі.

Мұндай жетістік пен табыс бүкіл Қазақстандағы жастарға үлгі болып, жаңа жеңістерге жетелейтіні анық. Халықаралық кезеңде өнер көрсететін жасөспірімдер ел намысын абыроймен қорғап, болашақ инженерлер мен ғалымдар буынының өсіп келе жатқанын дәлелдейді.

Айта кетейік, WRO халықаралық робототехника олимпиадасы 2004 жылы Сингапурде алғаш рет өткізілген. Жарыстың негізі 2003 жылы қаланған, ал алғашқы халықаралық финалы 2004 жылы өтті. Сол кезден бері WRO жыл сайын өткізіліп, финал түрлі елдерде ұйымдастырылды. Атап айтқанда, 2005 жылы – Бангкокта (Таиланд), 2006 жылы – Наннингте (Қытай), 2007 жылы – Тайбэйде, 2008 жылы – Йокогамада (Жапония), 2009 жылы – Похангта (Оңтүстік Корея), 2010 жылы – Манилада (Филиппин) өткен.

Кейінгі жылдарда да әртүрлі континенттерде өткізіліп жүр. Мысалы: 2011 жылы – Абу-Дабиде (БАӘ), 2015 жылы – Дохада (Катар), 2017 жылы – Сан-Хоседе (Коста-Рика), 2023 жылы – Панама Ситиде, 2024 жылы – Измирде (Түркия) ұйымдастырылды. Шымкенттік оқушылар бақ сынайтын 2025 жылғы финал Сингапурде өтеді.

Қазақстандық оқушылар бұған дейінгі WRO бәсекесінде бірнеше мәрте жүлде алған. Атап айтқанда, 2023 жылы Панама Ситидегі жарыста қазақстандық үш команда жүлдегер атанды. Олар бір күміс, екі қола медальге қол жеткізді. Ал 2022 жылы Германияда өткен жарыста шымкенттік оқушылар Иманғали Мыңжасар мен Бибарыс Михаш күміс медаль алып, робототехникадан әлем олимпиадасында 2-орынға ие болған алғашқы қазақстандық атанған.

Еламан Өмірхан

Шымкент қаласы