Шіркеймен күрес тамызға дейін жалғасады

«Жас Алашта» бұған дейін де жазылғандай, Сырдария өзені бойы мен Көксарай су реттегіш қоймасы маңындағы орналасқан елдімекендерде шіркейлердің көбеюі соңғы бірнеше жылда қалыпты жағдайға айналған. Жуырда бұл мәселе облыс әкімі Дархан Сатыбалдының төрағалығымен өткен жиында талқыланды. Өңір басшысы шіркейлерге қарсы химиялық өңдеу жұмыстары тиісті деңгейде жүргізілмей отырғанына тоқталып, сала басшыларын қатаң сынға алды. Кемшіліктерге жол бергені үшін жауапты басқарма басшысына тиісті шара қолдануды тапсырды. Өңірде шіркейге қарсы дезинсекция жүргізу аймақтары ретінде Түркістан, Кентау, Арыс қалалары мен Сауран, Отырар, Шардара аудандары белгіленген. Залалсыздандырылатын аумақ көлемі – 7 713,1 га.

– Өңірімізде шіркей және сол сияқты қансорғыш жәндіктермен күрес жұмыстары тоқтаған жоқ. Яғни химиялық және биологиялық әдістерімен өңделіп жатыр. Осы ретте облыс әкімінің тапсырмасына сәйкес, жалпы 17 052,9 гектар аумақ химиялық өңдеуден өтті. Түркістан қаласы аумағында – 386,4 гектар, Кентау қаласы аумағында – 37,9 гектар, Арыс қаласы аумағында – 279,23 гектар, Отырар ауданы аумағында – 166,3 гектар, Сауран ауданы аумағында – 107,5 гектар, Шардара ауданы аумағында – 243,8 гектар жер теліміне 3 реттен дезинсекция шаралары жүргізілді. Бұл жұмыстарды сапалы орындау мақсатында аудан, қала әкімдіктерімен бірлесіп, жұмысшы топ құрылған, – деді Қайрат Ерменұлы.

Сонымен қатар Сырдария өзенінің бірнеше аумағы бактицид препараты арқылы биологиялық әдіспен өңделген. Мамандардың пікірінше, былтырғы жылға қарағанда шіркейлердің саны биыл 4-5 есе көп.

— Егер біз дер кезінде жұмыс жүргізбегенде шіркейлер ошағы Түркістан облысын басып қалар еді. Бұл жұмыстарға 70-ке жуық техника, 80-нен астам жұмысшы жұмылдырылды. Жалпы, шіркейлерді түгелдей жою мүмкін емес. Тек санын азайту бағытында жыл сайын жұмыс істейміз. Жұмыстар жалғасады, – деді Қ.Ерменов.

Брифинг барысында Түркістан облысы энергетика және тұрғын үй-коммуналдық шаруашылық басқармасының бөлім басшысы Бахтыбек Убайдин өңірде зиянкестерге қарсы дәрілеу жұмыстары жоспарға сай жүргізіліп жатқанын атап өтті.

Басқарма өкілінің айтуынша, дәрілеу шаралары Сырдария өзенінің флорасы мен фаунасына зиян тигізбейді, тек шіркейлердің санын азайтып, жергілікті тұрғындарды күнделікті тіршілігіне қолайлы жағдай жасайды. Сондай-ақ шіркейге қарсы күрес шаралары тамыз айына дейін жүйелі түрде жалғаса береді және ол басқарманың қатаң бақылауында болады.

 «Satti Tulik» ЖШС-ы тарапынан ғылыми топ құрылып, шіркейлердің көбею ошақтарына байланысты зерделеу жұмыстары қолға алынған. Ғылыми зерделеу жұмыстарына 10 адам жұмылдырылған. Дезинсекция жұмыстарына 62 техника және 77 адам тартылған.