ШҚО-да «Туған жер – алтын бесігім» жәрмеңкесі басталды: өңірдің дәмі, дәстүрі мен үздік өнімдері

Жәрмеңкені Самар ауданы өткізді. Ауданның ауыл шаруашылығы тауар өндірушілері өздерінің ең сапалы өнімдерін ұсынды: балғын ет, жаңа піскен көкөністер, хош иісті нан-тоқаш өнімдері, табиғи сүт тағамдары және қолөнер бұйымдары. Жәрмеңкенің ерекшелігі - барлық өнімдер делдалсыз, өндірушіден тікелей, адал бағамен ұсынылды.

Сауда қатарларында: жаңа сойылған сиыр еті, жылқы еті мен құс еті, үй жағдайында дайындалған сүт өнімдері - айран, қатық, ірімшік, қаймақ болды. Өскемендіктер жаңа жиналған картоп, орамжапырақ, сәбіз, пияз, асқабақ секілді көкөністерді, табиғи бал, тосап, тұздалған өнімдер мен тәтті тоқаштарды, жұмыртқа, күнбағыс майы және жергілікті шеберлердің қолөнер туындыларын сатып алып жатты. Үй сүт өнімдеріне ерекше сұраныс болды - олардың сапасын қала тұрғындары жоғары бағалады.

«Біз бұл жәрмеңкеге туған жерімізде өз қолымызбен, махаббатпен өсірген бар өнімдерді алып келдік. Біз үшін бұл тек сауда ғана емес, әр өнімге салынған жан мен ықыласты бөлісу маңызды», – дейді жергілікті фермер.

Аталмыш жәрмеңке нағыз мерекеге айналды! Қонақтарды шығармашылық ұжымдардың өнері қарсы алды, қазақтың халық әндері шырқалды, ұлттық тағамдар дайындау мен дәстүрлі қолөнер бойынша шеберлік сабақтары өтті.

Ұйымдастырушылар - Самар ауданы әкімдігі мен ШҚО ауыл шаруашылығы басқармасы - жобаның басты мақсатын атап өтті: «Туған жер – алтын бесігім» - жай ғана жоба емес, бұл қала мен ауыл арасындағы тірі байланыс, ауыл еңбеккерлерін қолдау, ұлттық мұраны сақтау және өңірдің азық-түлік қауіпсіздігін нығайту жолы.

Жәрмеңке әр апта сайын демалыс күндері өтеді. ШҚО тұрғындары мен қонақтарын балғын, табиғи өнімдер мен қазақы рухқа толы ерекше атмосфера күтеді.