Швейцарияда Жаңа жыл түнінде жарылыс болып 40 адам қаза тапты

«Le Constellation» барында түнгі 01:30 шамасында өрт шығып, жарылыс болғаны туралы ақпарат тарады. Бұл орынға адамдар Жаңа жылды атап өту үшін жиналған болатын.

Ресми деректер бойынша шамамен 40 адам қаза тауып, 100-ден астам адам жараланған. Көптеген зардап шеккендердің жағдайы ауыр, оларды ауруханаларға жеткізу үшін тікұшақтар мен жедел жәрдем көліктері жұмылдырылды.

Апаттың нақты себебі әлі анықталмағанымен, Швейцария полициясы бұл теракт емес екенін және бастапқы болжам бойынша бұл оқиға кездейсоқ өрттен басталған болуы мүмкін екенін айтады. Тергеу жұмыстары әлі де жалғасуда.

Куәгерлердің айтуынша, өрт өте тез таралып, адамдар әбігерге  түсіп, кейбіреулері терезелер арқылы қашуға тырысқан.

Оқиға орнына 10-ға жуық тікұшақ, 40-тан астам жедел жәрдем көліктері және жүзден аса құтқару қызметкерлері жіберілді. Ауруханаларда орын аз болғандықтан, жараланғандар елдің басқа аймақтарындағы медициналық мекемелерге де жеткізілуде.

Қазіргі уақытта шетел азаматтары да зардап шеккендер арасында бар екені белгілі — олардың нақты саны мен жасалған анықтау жұмыстары жалғасып жатыр.