Сирияда Асадқа қарсы жасақтар Хама қаласына жақындады

Reuters тілшілерінің хабарлауынша, үкіметке қарсы қарулы топтар сейсенбі күні ірі Хама қаласына жақындады. Хамаға шабуыл Ресей мен Иран одақтастарының қолдауына ие болған Башар Асад үкіметіне қысымды күшейтеді.

Хама 2011 жылы елде азаматтық соғыс басталғаннан бері Сирия үкіметінің бақылауында.

Иран Сыртқы істер министрі Аббас Арақчи сұхбатында Тегеран Сирияға әскер жіберу мүмкіндігін қарастыруды жоспарлап отырғанын айтты. Reuters агенттігі Владимир Путиннің Сириядағы «террористік агрессияны» тоқтату қажеттігі туралы айтқан сөзін РИА агенттігіне сілтеме жасап хабарлады.

Сирияның ең үлкен қаласы Алеппоның өткен аптада көтерілісшілер басып алуы үкіметке қарсы күштердің кейінгі жылдардағы ең ірі шабуылының нәтижесі болды.

Ирак және сириялық ақпарат көздерінің хабарлауынша, Иран қолдайтын жүздеген ирактық жасақ Сирия үкіметі күштеріне қолдау көрсету үшін дүйсенбі күні Сирияға кірді.

Кейінгі күндері ресейлік және сириялық ұшақтар көтерілісшілерге қарсы шабуылдарын күшейтті, деп хабарлады екі тарап өкілдері.

Айта кетейік, наразылықты Сириядағы қақтығыстарға көп жылдар бойы қатысып келе жатқан Хайят Тахрир аш-Шам тобы басқарады. Сириядағы адам құқықтарын бақылау орталығының хабарлауынша, шабуылға Түркия қолдайтын бірнеше бүлікші топ та қосылған. Түркия Сыртқы істер министрі Хакан Фидан мұны жоққа шығарды.

Хайят Тахрир аш-Шам қандай топ?

Хайят Тахрир аш-Шам (ХТШ) немесе Левантты азат ету ұйымы 2011 жылы құрылған. Ол кезде ол «Джебхат ан-Нусра» («Ән-Нусра майданы») деп аталды және «Әл-Каида» террористік ұйымының тікелей серіктесі болды.

ХТШ ұйымдастырушыларының бірі кейін ДАИШ-тің басшысы болған Әбу Бәкір әл-Бағдади болды.

ХТШ Сириядағы азаматтық соғыс кезінде президент Асадқа қарсы шыққан ең қауіпті топтардың бірі еді. Бірақ оның қозғаушы күші революциядан гөрі жиһадтық идеологияға ерді. Бұл «Еркін Сирия» туымен әрекет ететін көтерілісшілердің негізгі коалициясының ниетіне қайшы келді.

2016 жылы топ жетекшісі Әбу Мұхаммад әл-Джулани террористік ұйым деген таңбадан құтылу үшін «Әл-Қаидадан» жұртшылық алдында бөлініп, «Джебхат ан-Нусра» ұйымын таратып, жаңа ұйым құрды, ал бір жылдан кейін өзі сияқты кішігірім топтармен бірге бұл топ – «Хайят Тахрир аш-Шам» деп аталды.