Сорбұлақ маңында жоғалған әскери тікұшақты іздеу жалғасып жатыр

Бұл туралы Қазақстан Қорғаныс министрлігі хабарлады.

Құтқару операциясына шамамен 400 адам тартылған. Олардың қатарында құтқарушылар, әскери қызметкерлер, полицейлер, сүңгуірлер және кинологтар бар. Сонымен қатар ондаған техника, қайықтар, дрондар мен су астын тексеруге арналған арнайы жабдықтар қолданылуда.

– Іздестіру жұмыстарына шамамен 400 адам, 70-тен астам жерүсті техникасы, 21 жүзу құралы, 10 ұшқышсыз ұшу аппараты, эхолоттар, су асты сканерлеу құралдары мен кинологиялық топтар тартылды. Операцияға Қазақстан Қарулы Күштері Әуе қорғаныс күштерінің қолбасшысы, авиация генерал-майоры Асқар Ызбасов жетекшілік етуде. Ол барлық бөлімшелердің жұмысын үйлестіріп жатыр, - делінген Қорғаныс министрлігінің ресми хабарламасында.

Іздеу тек су астында емес, сонымен қатар жағалау бойындағы терең және қол жетуі қиын учаскелерде де жүргізілуде. Ведомствоның мәліметінше, тікұшақ экипажының туыстарымен тұрақты байланыс орнатылып, олар іздеу барысынан хабардар етіліп отыр.

Алайда іздеу жұмыстарын күрделендіріп отырған бірнеше фактор бар: су қоймасының түбі лайлы, көріну мүмкіндігі жоқ, кейбір жерлерде тереңдік 22 метрге дейін жетеді.

– Табиғи және техногендік жағдайлар өте жоғары дәлдікті, техникалық жабдықталуды және барлық қатысушылардың үйлесімді жұмысын талап етеді, - деп нақтылады Қорғаныс министрлігі.

Ведомство іздеу операциясы тікұшақ бортында болған барлық адам табылғанға дейін жалғасатынын атап өтті.

Еске салайық, EC-145 әскери тікұшағы 25 шілде күні Алматы облысындағы Луговое аэродромынан ұшып шыққан соң байланысқа шықпай қалған. Жамбыл облысы, Отар ауылы маңында тікұшақ радардан жоғалып кеткен. Бортта үш экипаж мүшесі болған. 26 шілде күні Сорбұлақ көлі маңында қазақстандық құтқарушылар әуе кемесіне тиесілі болуы мүмкін сынықтарды тапқан. Алдын ала болжам бойынша, бұл жоғалған тікұшақтың қалдықтары.

Жоғалған EC-145 әскери тікұшағының экипаж мүшелерінің туыстары Президент Тоқаев пен министрлерге үндеу жасап, іздестіруді түнде де тоқтатпай жүргізуді сұрады. Олар үш сарбаз – Амангелді Аман, Бахтияр Ержігітов пен Нұржігіт Үйсінбаевтың тірі екеніне үміттеніп отыр.