Сот ақтаған шенеунік қонақүйде көз жұмды

Алдын ала мәліметке сәйкес, оған жүрек талмасы себеп болған. Қонақүй әкімшілігі жедел жәрдем шақырғанымен, дәрігерлердің барлық әрекетіне қарамастан оның өмірін сақтап қалу мүмкін болмады.

Мұрат Досмұратов — инженер-химик, Мәскеудегі И.М.Губкин атындағы мұнай-химия және газ өнеркәсібі институтының түлегі.

• Еңбек жолын Шымкент мұнай өңдеу зауытында бастаған.

• Кейін «ҚазМұнайГаз» құрылымдарында және бірқатар мұнай-химия компанияларында басшылық қызметтер атқарған.

• 2022 жылдың шілдесінде Атырау мұнай өңдеу зауытының (АНПЗ) бас директоры болып тағайындалды, бұл қызметті 2024 жылдың басына дейін атқарды.

2024 жылдың күзінде сот Досмұратовты қызметінде кінәлі деп танылды. Айып бойынша, ол кепілдікке жататын жылуалмастырғышты тегін жөндетудің орнына жаңа келісімшартқа отырып, мемлекетке 2 млрд теңгеге жуық шығын келтірген. Сот оны қылмыстық жауапкершіліктен ескіру мерзіміне байланысты босатты, бірақ мемлекет пайдасына 1,9 млрд теңге және 19 млн теңге баж салығын өндіріп алды.

Кейін Бас прокуратура қарсылық білдірді. Жоғарғы сот істі қайта қарап, төменгі сот шешімдерін жойды. Қайта тергеу барысында прокуратура айыптан толықтай бас тартты. Сот Досмұратовтың өзінен бұрынғы жағдайдың құрбаны болғанын атап, оны ақтап шықты.

2025 жылғы 16 қыркүйекте Мұрат Досмұратов «ҚМГ Инжиниринг» компаниясына мұнай өңдеу және мұнай-химия жөніндегі басқарушы директор болып тағайындалған еді. Ол бұл қызметте бар-жоғы екі апта жұмыс істеді.