Сотталған адам колония бастығын ҰҚК-ға ұстатты: СҚО-дағы даулы істің мән-жайы

Жоғары лауазымды әділет қызметкері сотталған адамға «бостандыққа шығуға көмектесемін» деп уәде беріп, ақырында өзі сот алдында жауап берді.

Сотта белгілі болғандай, Ольшанка ауылындағы ең төмен қауіпсіздік деңгейіндегі мекемені басқарған Рахметов сотталған Қажмұрат Аюпқа жазасын жеңілдетуге «көмек» ұсынған. Ол бұл қызметі үшін алдымен 500 мың теңге, кейін тағы 200 мың теңге сұраған. Өз сөзінде прокуратура және сот қызметкерлерімен «келісіп бере алатынын» айтқан.

Кабинеттегі арнайы операция

Ауыр қылмыс үшін жазасын өтеп жатқан сотталған адам күмәнданып, заң аясында әрекет етуді ұйғарған. Ол ҰҚК департаментіне арыз түсірген. Одан кейінгі оқиға жедел қызметкерлердің жоспары бойынша өрбіген:

• Сотталған адам колония бастығымен әңгімесін оның кабинетінде диктофонға жазып алған;

• Жедел қызметкерлер Аюпқа алдын ала арнайы ұнтақ жағылған 200 мың теңге берген;

• Ақша 19 ақпанда берілген: сотталған оны бастығының шкафында ілулі тұрған қызметтік күртешесінің қалтасына салған.

Үкім және атақтан айыру

Апелляция сотталған адамның жазасын жеңілдетуден бас тартқанына қарамастан (яғни, колония бастығы бұл шешімге ықпал ете алмайтыны анықталған), Рахметов ақшаны иемденген. Көп ұзамай ол ұсталды.

Петропавл соты Рүстем Рахметовті – алаяқтық, қылмысқа оқталу, пара беруге итермелеу баптары бойынша кінәлі деп таныды.

Сот үкімі бойынша 3 миллион теңге айыппұл салынды, мемлекеттік қызметте жұмыс істеуге өмір бойына тыйым салынды, әділет подполковнигі арнайы атағынан айырылды.

Үйқамақта өткізген уақыты ескеріліп, айыппұл сомасы аздап қысқартылды. Қазіргі уақытта үкім заңды күшіне енген жоқ, оған шағым түсіруге болады.