Стамбұлдың бұрынғы мэріне жеті жыл түрме жазасы қаупі төніп тұр

 Оған жемқорлық, қылмыстық ұйымға жетекшілік ету және тыйым салынған Күрд жұмысшы партиясымен байланыс орнату сынды ауыр айыптар тағылып отыр. Егер оның кінәсі дәлелденсе, Имамоғлу жеті жылға дейін бас бостандығынан айырылуы мүмкін.

Сот отырысы жұма күні, 11 сәуірде өтті. Саясаткер өзіне тағылған айыптарды теріске шығарып, істі «саяси қуғын-сүргін» деп атады.

— «Мен мұнда Стамбұлда үш рет сайлауда жеңіске жеткенім үшін келіп отырмын. Мен мұнда 86 миллион адамның жүрегіндегі президент болғаным үшін келдім», — деді ол сот залында сөйлеген сөзінде.

Имамоғлу — қазіргі президент Реджеп Тайып Ердоғанның 2028 жылғы сайлаудағы басты қарсыласы ретінде қарастырылып жүрген саяси тұлға. Ол 19 наурызда, президенттік сайлауалды науқан басталардан бірнеше күн бұрын ұсталған. Мемлекеттік Anadolu агенттігінің хабарлауынша, саясаткерге пара алу, терроризмді қолдау және қылмыстық ұйыммен байланыс орнату айыптары тағылған.

Бұл — Имамоғлуға қарсы билік тарапынан көрсетіліп отырған алғашқы қысым емес. 2022 жылы ол сайлау комиссиясы мүшелерін «қорлады» деген айыппен шартты жаза алған. Ал 2023 жылғы сайлау алдында бірқатар қоғамдық шараларға қатысуына тыйым салынған болатын.

Келесі сот отырысы 16 маусымға белгіленген.

Экрем Имамоғлуның ұсталуына байланысты Түркияның бірнеше қаласында наразылық шерулері басталып, әлі күнге дейін жалғасып жатыр. Саяси сарапшылар бұл жағдайды биліктің оппозицияны әлсіретуге бағытталған әрекеті ретінде бағалауда.

Экрем Имамоғлу кім?

Экрем Имамоғлу — Түркиядағы ең ықпалды оппозициялық саясаткерлердің бірі. Ол 2019 жылы Стамбул мэрі болып сайланып, биліктегі «Әділет және даму» партиясының ұзақ уақыттық үстемдігін бұзды. Қалалық басқарудағы реформаларымен және демократиялық ұстанымдарымен танылған Имамоғлу бүгінде халық арасында кең қолдауға ие. Ол 2028 жылы өтетін президенттік сайлауға негізгі үміткерлердің бірі ретінде ұсынылып отыр.