Талғардағы адам өлтіру мен адам ұрлау ісі бойынша учаскелік инспектор сотталды

Ол қызметтік салғырттық пен жалған құжат жасағаны үшін кінәлі деп танылды.

Сот үкімі

Талғар аудандық соты учаскелік инспектор Е.-ні ҚР Қылмыстық кодексінің екі бабы бойынша кінәлі деп тапты:

• 371-баптың 2-бөлігі – ауыр зардаптарға әкелген салғырттық;

• 369-баптың 2-1-бөлігі – құқық қорғау органы қызметкерінің қызметтік жалғандық жасауы.

Сот үкімімен:

• 369-бап бойынша – 2 жыл 2 ай;

• 371-бап бойынша – 2 жыл 4 ай жаза тағайындалды.

Ақырғы жаза ретінде 2 жыл 4 айға бас бостандығынан айыру белгіленіп, ол орташа қауіпсіздік мекемесінде өтеледі. Инспектор сот залында қамауға алынды.

Сонымен қатар, ол өмір бойына мемлекеттік қызметте жұмыс істеу құқығынан айырылып, лейтенант арнайы атағынан айырылды.

Сот жәбірленуші тараптың моральдық өтемақы өндіру туралы талап-арызын қанағаттандырып, 3 миллион теңге төлеуді міндеттеді.

Үкім заңды күшіне енген жоқ, тараптар апелляциялық тәртіппен шағымдана алады.

Тағылған айыптар

2025 жылғы 3 қыркүйекте, қайғылы оқиғадан үш күн бұрын, учаскелік инспектор жәбірленуші әйелдің шақыртуымен барған. Сол күні әйелдің үйіне мылтық ұстаған ер адам келген. Әйелдің айтуынша, ол бұған дейін оны зорлаған.

Адвокат Жандос Палмановтың мәліметінше, инспектор қорғау нұсқамасын рәсімдегенімен, жәбірленушінің қолын қолдан қойған.

"Сараптама қолтаңбаның жәбірленушіге тиесілі емес екенін растады. Сотта айыпталушы өзі де қолды қолдан қойғанын мойындады", - деді адвокат.

Қайғылы оқиға қалай болды

2025 жылғы 6 қыркүйекте сол күдікті ер адам әйелдің үйіне қайта келіп:

• оның 27 жастағы ағасын атып өлтірді;

• екі кәмелетке толмаған сыбайласымен бірге әйелдің екі жасар қызын ұрлап кетті.

Кейін арнайы жасақ баланы құтқарып, анасына қайтарды. Күдікті ұсталды.

2026 жылғы 18 наурызда Алматы облысының қылмыстық істер жөніндегі мамандандырылған соты негізгі айыпталушыны 25 жылға, ал екі жасөспірімді 9 жылдан бас бостандығынан айырды.

Басқа полицейлер де жауапқа тартылған

Прокуратура Талғар ауданындағы тағы бірнеше полиция қызметкеріне қатысты іс қозғаған. Қазір сотқа төрт қызметкердің ісі жеткен:

• екі учаскелік – салғырттық пен жалғандық бойынша;

• екі тергеуші – қызметтік өкілеттігін асыра пайдалану және әрекетсіздік бойынша айыпталуда.

Бұл оқиға трагедиядан бір ай бұрын басталған.

Жәбірленуші әйел полицияға зорлау фактісі бойынша арыз жазған. Алайда күдікті ұсталмаған. Кейін отбасы оны өздері тауып, полицияға тапсырғанымен, ол қайта босатылған.

6 қыркүйекте күдікті қарумен қайта келіп, адам өлтіріп, баланы ұрлап кеткен. Қашу кезінде ол көлікпен жардан құлап, бала жарақат алған. Кейін қызға ота жасалған.