Талғардағы тұрғын үй және Есіктегі ескі мектеп

 Сапар барысында әкім су жүйелері, тұрғын үйлер, мектеп пен өндіріс орындарының жұмысын қадағалады.

Талғардағы магистральды су құбыры – стратегиялық жоба

Сапар Талғар қаласындағы селден қорғау бөгетінен №2 учаскеге дейін тартылып жатқан магистральды су құбырынан басталды. Ұзындығы 22,5 шақырымды құрайтын жобаға 4,6 млрд теңге бөлінген, оның бүгінде 1,3 млрд теңгесі игерілген.

Құбырды монтаждау мен резервуарларды гидрооқшаулау жұмыстары аяқталуға жақын. Алайда ішкі инженерлік желілер мен зертханалық жабдықтарды жеткізу үшін қосымша қаржы қажет.

«Су – өмірдің негізі. Бұл жобаны дер кезінде және сапалы аяқтау өте маңызды», – деді облыс әкімі.

Жаңа үйлер – тұрғындарға қолжетімді баспана

Талғар қаласында жаңа тоғыз қабатты тұрғын үйлердің құрылысы қарқынды жүріп жатыр. Үш үй толық дайын, пәтерлер қоныстануға әзір. Тағы екі үйдің құрылысы соңғы сатысында. Бұл жоба талғарлықтар үшін көптен күткен баспана мәселесін шешуге мүмкіндік береді.

Asia Pets зауыты – отандық жем өндірісінің үлгісі

Еңбекшіқазақ ауданының Қойшыбек ауылындағы Asia Pets зауытында Mascot брендімен үй жануарларына арналған жем шығарылады. Мұнда 25 адам еңбек етуде. Өндіріс неміс технологиясына негізделген, ет қалдықтарын қайта өңдеу арқылы экологиялық әрі пайдалы өнім алынады.

«Кәдеге жарамайтын шикізатқа екінші өмір беріп отырмыз. Болашақта қызметтік иттерге арналған жем шығару жоспарымыз бар», – деді зауыт директоры Р.Іргебаев.

Есік қаласында жаңа тұрғын үй кешені бой көтеруде

Есік қаласында үш 60 пәтерлі және бір 40 пәтерлі үйдің құрылысы жүргізілуде. Жалпы құны – 3 млрд теңге. Бүгінде қаржының екіден үш бөлігі игеріліп, құрылыс 2026 жылдың тамызында аяқталады деп жоспарланып отыр.

Абылай хан атындағы мектепке күрделі жөндеу

1938 жылы салынған Есік қаласындағы Абылай хан атындағы мектеп алғаш рет толық күрделі жөндеуден өтуде. Қазір жұмыстың 90%-ы аяқталған. Жөндеу процесіндегі кідіріс тек рұқсат құжаттарының рәсімделуіне байланысты.

М.Сұлтанғазиев мектеп ғимаратын аралап, аулаға қосымша волейбол және баскетбол алаңдарын салуды ұсынды. Мектепті жыл соңына дейін толық ашу көзделіп отыр.

Әкім әр нысанда қаржыландыру көздері мен субсидия қажеттілігін қарап, келісімшарттардың орындалу мерзімін нақтылады.

Сапар қорытындысында келесі міндеттер белгіленді: тұрғын үйлердегі әрлеу жұмыстарын аяқтау; мектеп пен су құбырына арналған жабдықтарды уақытылы жеткізу; барлық нысандардың іске қосылу кестесін нақтылау.

Алматы облысында жүзеге асып жатқан жобалар өңірдің әлеуметтік және экономикалық дамуына серпін беріп, тұрғындардың өмір сапасын арттыруға бағытталған.

Жалпы, соңғы жылдары Алматы облысы елдегі ең ірі құрылыс аймақтарының біріне айналды. Тек биылдың өзінде 1 млн шаршы метрден астам тұрғын үй пайдалануға беріліп, жүздеген әлеуметтік нысан жаңартылуда.

Облыс орталығы Қонаев қаласының дамуы мен агломерацияға жақын елді мекендердің жаңару қарқыны ерекше. Талғар, Есік, Іле, Қарасай аудандарында жаңа тұрғын үйлер, мектептер мен инженерлік желілер салынып жатыр.

2025 жылы облыста құрылыс саласына шамамен 320 млрд теңге инвестиция тарту жоспарланған. Оның ішінде 60 пайызы жеке капитал есебінен жүзеге асырылмақ. Мақсат – халықтың өмір сапасын жақсарту. Инфрақұрылым мен тұрғын үй құрылысы әлеуметтік тұрақтылықтың негізі. Әкімдік осы бағытта «Жайлы қала – жайлы өмір» қағидаты бойынша кешенді жоспар әзірлеп отыр.

Облыс әкімінің жұмыс сапарында көтерілген басты тақырыптардың бірі – ауыз су мен инженерлік желілердің жағдайы. Бұл бағытта облыс бойынша 70-тен астам жоба іске асырылып жатыр. Мысалы, Талғардағы 22,5 шақырымдық магистральды су құбырының іске қосылуы қаланың 40 мың тұрғынын тұрақты сумен қамтамасыз етеді.

Ал тұрғын үй құрылысы саласында «Нұрлы жер» және «Жайлы үй» бағдарламалары арқылы 5 мыңнан астам отбасы баспаналы болады деп күтілуде.

Экономистердің айтуынша, мұндай жобалар өңірлік ЖІӨ-нің өсуіне, құрылыс материалдары мен жергілікті шағын бизнестің дамуына серпін береді.

Әнуар ҚАЙЫРБЕК

Алматы облысы