Жазылу
Таразда Жамбыл облысы полициясы департаменті бастығының орынбасары ұсталды
Тараз қаласында Ішкі істер министрлігінің Өзіндік қауіпсіздік департаменті Жамбыл облысы полиция департаменті бастығының бұрынғы орынбасары Жандарбек Құттыбаевты ұстады. Ол алаяқтық жасады деген күдікке ілінді.
Іс Талас аудандық полиция қызметкерлеріне қатысты кадрлық мәселелермен байланысты болуы мүмкін. Алдын ала мәлімет бойынша, кейбір қызметкерлерді тәртіптік комиссия шешімінен кейін жауапкершіліктен құтқарып, қызметіне қайта орналастыру әрекеті болған.
ІІМ ресми хабарламасында Құттыбаев ұсталған кезде қызметтік міндетін атқармайтыны атап өтілген. Ол 2025 жылғы 29 тамызда министрдің бұйрығымен қызметінен белгілі себептер бойынша босатылған.
– Өзіндік қауіпсіздік департаменті заңсыз әрекет жасады деген күдікпен Жамбыл облысы ПД бастығының бұрынғы орынбасарын ұстады. Күдікті уақытша ұстау изоляторына қамалды. Қазір сотқа дейінгі тергеу амалдары жүргізіліп жатыр, – делінген министрліктің ресми түсініктемесінде.
