Тбилисиде президент сарайына шабуылдады

4 қазан күні Грузия астанасы Тбилисиде жергілікті сайлау күні жаппай наразылықтар өршіді. Мыңдаған адам Руставели даңғылына жиналып, билікке қарсы үндеу тастады. Кейін олардың бір бөлігі президент сарайын басып алуға әрекеттенді.

Руставели даңғылындағы наразылық

Куәгерлердің айтуынша, жергілікті уақыт бойынша сағат 16:00 шамасында оппозицияның ұйымдастырған митингі басталған.

Ондаған мың адам Грузия парламенті ғимаратының алдында жиналып, көлік қозғалысын толықтай тоқтатқан.

Бұл акция елдің жаңа президенті Михаил Кавелашвилидің билігіне қарсы бағытталды. Наразы жұрт жаңа сайлау өткізуді және биліктің отставкасын талап етті.

Президент сарайын басып алу әрекеті

Митингтің бір бөлігі — шамамен жүзге жуық адам — Руставелиден Орбелиани президент сарайына бет алған. Бұл ғимарат парламенттен небәрі 350 метр жерде орналасқан.

Олар «Біртұтас ұлттық қозғалыс» партиясының өкілі, бұрынғы президент Михаил Саакашвилидің серігі Муртаз Зоделева бастаған топтың үндеуіне еріп, президент сарайын басып алуға  шыққан.

Кейбір наразылар сарай маңындағы қоршауды сындырып, баррикадалар құрып, өрт қойған. Полиция көзден жас ағызатын газ және су атқыштар қолданған. DW тілшісінің хабарлауынша, қақтығысқа қатысқандардың саны жүз адам шамасында болған.

Зурабишвили: «Бұл – биліктің ұйымдастырған спектаклі»

Грузияның экс-президенті Саломе Зурабишвили наразылықты қолдап, алайда сарайды басып алу әрекетін айыптады.

Ол әлеуметтік желідегі жазбасында:

«Президент сарайын басып алу – бұл биліктің 310 күннен бері жалғасып келе жатқан бейбіт наразылықты беделден айыру үшін арнайы ұйымдастырған айласы. Мен мұны ресми түрде жоққа шығарамын және өз халқыммен бірге жаңа сайлауға дейін бейбіт түрде күресуді жалғастырамын», – деп мәлімдеді.

Полиция мен биліктің ұстанымы

Грузия Ішкі істер министрлігінің өкілі наразылық заң аясынан шыққанын мәлімдеп, «кейбір ұйымдастырушылар зорлыққа шақырған және президент сарайының қоршауын бұзып, ішке кіруге тырысқан», – деді.

Министрлік полицияның «пропорционалды күш» қолданып жатқанын атап өтті.

Сонымен қатар, «мемлекеттік төңкеріс әрекеті» бабы бойынша қылмыстық іс қозғалды.