Темірлан Еңсебекке қатысты қылмыстық іс апелляциялық деңгейде қайта қаралады

Кочневаның айтуынша, тыңдалым WhatsApp видеобайланысы арқылы онлайн форматта өтпек. Алайда ол бұл шешімге наразылық білдіріп, әлеуметтік желіде пікір қалдырды:

«Бұл — қарапайым әкімшілік іс емес, 15 түрлі шектеу белгіленген қылмыстық іс! Тиманың тағдыры шешілгелі отыр, ал олар оны мессенджермен өткізбек. Бұл — абсурд!» – деді ол.

11 сәуір күні Наурызбай аудандық соты Темірлан Енсебекті ҚР Қылмыстық кодексінің 174-бабы бойынша (Әлеуметтік, ұлттық, рулық, нәсілдік, таптық немесе діни алауыздықты қоздыру) кінәлі деп тауып, 5 жыл бас бостандығын шектеу жазасын тағайындаған.

Қылмыстық іске ресейлік тележүргізуші Тина Канделаки туралы сатиралық жазба мен «Йоу, орыстар» әнінің пародиялық мәтіні себеп болған. Бұл жазбаны Qaznews24 сатиралық форматта жариялаған.

Qaznews24 — әлеуметтік және саяси тақырыптарды әзіл-сықақпен жеткізетін  онлайн жоба. Белсенділер мен құқық қорғаушылар Енсебекке тағылған айыптың саяси астары барын айтып келеді.