Тоқаев: Экономикалық интеграция Қазақстан мүддесіне сай әділетті болуы тиіс

Мемлекет басшысы Қазақстан экономикалық интеграцияны қолдайтынын, алайда бұл үдеріс ұлттық мүдделерге сай әділетті сипатта болуы керектігін атап өтті.

Президенттің айтуынша, Қазақстан биыл Еуразиялық экономикалық одақ-қа төрағалық етеді. Осыған байланысты негізгі басымдықтардың бірі – жасанды интеллектіні кеңінен енгізу арқылы еуразиялық интеграцияның тиімділігін арттыру, сондай-ақ саудадағы кедергілер мен негізсіз протекционизмді жою.

Сонымен қатар Қасым-Жомарт Тоқаев ауыл шаруашылығы өнімдерін қайта өңдеу саласында қалыптасқан жағдайға назар аударды. Оның айтуынша, ЕАЭО елдерінен келетін субсидияланған өнімдер қысымынан отандық азық-түлік өнеркәсібі өндірісті қысқартуға мәжбүр болып отыр, бұл азық-түлік қауіпсіздігіне тікелей әсер етеді.

Президент Үкіметке ұлттық экономикалық мүдделерді қорғау бағытындағы жұмысты күшейтуді тапсырды.

— Өзара мүдделердің әділетті тепе-теңдігін табу қажет. Қазақстанның ұстанымын сауатты әрі дәлелді түрде қорғауымыз керек. Тек сонда ғана экономикамыз халықаралық нарықта бәсекеге қабілетті болады, — деді Мемлекет басшысы.