Жазылу
Трамп: АҚШ НАТО-дан шығу мүмкіндігін қарастырып жатыр
Дональд Трамп НАТО-дағы одақтастарды және Украинаны сынға алып, Вашингтон альянстан шығу мүмкіндігін «байыпты түрде қарастырып жатқанын» мәлімдеді.
Бұл туралы ол 1 сәуірде The Telegraph басылымына берген сұхбатында айтты.
«НАТО – қағаз жолбарыс»
Трамп НАТО-ны «қағаз жолбарыс» деп атап, альянс өзіне ешқашан әсер қалдырмағанын жеткізді.
«Мен бұл мәселе талқыланбайды дер едім. НАТО мені ешқашан таңғалдырған емес. Мен оны әрқашан қағаз жолбарыс деп санадым. Путин де мұны біледі», – деді ол.
Ормуз бұғазы мен Иран факторы
Трамптың айтуынша, НАТО елдері Иран жауып тастаған Ормуз бұғазын ашу операциясына қатысудан бас тартқан. Бұл бұғаз арқылы әлем мұнайының шамамен 20%-ы тасымалданады.
Ол одақтастарын сынға алып:
«Олар ол жерде болған жоқ. Бұл автоматты түрде жүзеге асуы тиіс еді. Біз сауда жасап жатқан жоқпыз, бұл табиғи түрде болуы керек», – деді.
Сондай-ақ Трамп Украина да бұл операцияға қатысуы тиіс еді деп санайды:
«Біз оларға көмектестік, бірақ олар бізге көмектеспеді», – деді ол.
АҚШ позициясы қайта қаралуы мүмкін
Бұған дейін Марко Рубио Fox News арнасына берген сұхбатында АҚШ-тың НАТО-мен қарым-қатынасты қайта қарауы мүмкін екенін айтқан.
«Егер НАТО тек Еуропаны қорғау үшін керек болып, бізге қажет кезде қолдау көрсетпесе – бұл тиімді келісім емес», – деді Рубио.
Трамп бұл мәлімдемені қолдайтынын жеткізді.
Ұлыбританияға сын
Сұхбат барысында Трамп Кир Стармер үкіметін де сынға алып, Ормуз бұғазына әскери кемелер жіберуден бас тартқанын атап өтті.
«Сіздерде толыққанды флот та жоқ. Кемелеріңіз ескі, авианосецтеріңіз жұмыс істемейді», – деді Трамп.
Ал Стармер өз кезегінде Ұлыбритания «ұлттық мүдделерге сүйене отырып әрекет ететінін» мәлімдеді. Оның айтуынша, қазіргі тұрақсыз әлемде Еуропамен қорғаныс, қауіпсіздік және экономика салаларындағы ынтымақтастық аса маңызды.
