Жазылу
Трамп Гренландия туралы: «Уақыты келді, бұл міндетті түрде іске асады!»
АҚШ президенті Дональд Трамп жексенбі күні Truth Social әлеуметтік желісінде Гренландияға бақылау орнату тақырыбына қайта оралды. Ол Дания соңғы 20 жылда ескертулерге қарамастан өзінің автономды аумағын «ресейлік қауіптен» қорғау үшін жеткілікті шара қабылдамағанын жазды.
«Енді уақыты келді, бұл міндетті түрде іске асады!» - деп мәлімдеді Трамп.
Хаттар, талаптар және баж салығы
Бірқатар БАҚ, соның ішінде PBS пен Bloomberg, Трамптың Норвегия премьер-министрі Йонас Гар Стёре атына хат жолдағанын хабарлады. Ресми жарияланбағанымен, басылымдар келтірген хатта АҚШ бұдан былай тек бейбіт бастамаларға емес, ұлттық мүдделеріне басымдық беретінін жазады. Онда Трамп өзінің бейбітшілік бастамалары үшін Нобель сыйлығын алмағанын да атап өтіп, Гренландияға қатысты талаптарын қайталайды.
БАҚ дерегінше, хатта:
«АҚШ Гренландияны толық бақылауға алмайынша, әлем қауіпсіз болмайды», - деген тұжырым бар.
Осыған дейін Трамп Дания, Норвегия, Швеция, Франция, Германия, Ұлыбритания, Нидерландтар және Финляндиядан АҚШ-қа жеткізілетін барлық тауарларға 10% баж салығын енгізу жоспарын жариялаған. 1 маусымнан бастап бұл мөлшер 25%-ға дейін өседі. Президент бұл баж «Гренландияны толық әрі түпкілікті сатып алу туралы келісімге» қол жеткізілгенге дейін күшінде болатынын айтты.
Дания мен Гренландияның жауабы
Дания мен Гренландия басшылары «Гренландия сатылмайды» деп мәлімдеп, аралдың тағдырын АҚШ шешпеуі тиіс екенін айтты. Олар сондай-ақ Трамптың Гренландия Ресей немесе Қытайдың ықпалына өтуі мүмкін деген уәждерін жоққа шығарды.
