Трамп Иранды қыздарға арналған мектепке жасалған шабуылда айыптады

Бұл туралы ол журналистерге президенттік Air Force One ұшағында сөйлеген кезде айтты. Трамптан АҚШ-тың бұл оқиғаға қатысы бар ма деген сұрақ қойылған.

«Жоқ, менің ойымша, көрген мәліметтеріме сүйенсек, мұны Иранның өзі жасаған», — деді АҚШ басшысы.

Алайда АҚШ қорғаныс министрі Пит Хегсет бұл нұсқаны тікелей растаған жоқ. Оның айтуынша, америкалық билік органдары оқиғаның барлық мән-жайын әлі де тексеріп жатыр.

Минаб қаласындағы (Хормозган провинциясы) «Шаджаре Тайебе» атты қыздар мектебіне зымыран соққысы 28 ақпан күні таңертең жасалған. Жергілікті биліктің дерегінше, кемінде 175 адам қаза тапқан, олардың басым бөлігі — осы оқу орнының оқушылары.

Бұған дейін The New York Times газеті спутниктік суреттерге жасалған талдауға сүйене отырып, мектеп жоғары дәлдіктегі қарумен жойылғанын хабарлаған. Бұл соққы жақын маңдағы Ислам революциясы сақшылар корпусының (КСИР) әскери-теңіз базасына жасалған шабуылмен бір мезгілде жүзеге асқан.

Иран аумағына жасалған соққылар 28 ақпанда АҚШ пен Израильдің әскери операциясы басталғаннан кейін күшейген. Бұған жауап ретінде Тегеран Израильге және Таяу Шығыста орналасқан америкалық әскери нысандарға зымырандар мен дрондар арқылы соққы берген.