Трамп Қазақстаннан келетін тауарларға 25% кедендік баж салығын енгізді

⠀Трамп бірқатар елдерге қатысты импорттық баж салығын енгізу туралы жарлықтар топтамасын бекітті. Бұл құжаттар 1 тамызға санаулы сағаттар қалғанда қол қойылып, Ақ үйдің ресми сайтында жарияланды.

Жаңа тарифтер 10%-дан 41%-ға дейінгі аралықты қамтиды. Ал Қазақстан үшін арнайы 25% көлемінде тұрақты мөлшерлеме белгіленді.

АҚШ президенті Қасым-Жомарт Тоқаевқа жолдаған ресми хабарламасында бұл шешімнің себебін «саудадағы кедергілерді түзету» және «АҚШ-тың ұлттық қауіпсіздігін қорғау» қажеттілігімен түсіндірді.

Қазақстан не істей алады?

ҚР Сауда және интеграция министрлігі АҚШ-қа өз ұсынысын жолдағанын, келіссөздер жүргізуге дайын екенін хабарлады. Алайда, министр Арман Шаққалиев сәуірде де осындай уәде бергенімен, еш нәтиже болмаған. Бұл жолы да нақты ілгерілеу байқалмай отыр.

Экономист Ләззат Жанмолда бұл тарифтің ел экономикасына үлкен әсері болмайтынын, өйткені Қазақстан АҚШ-қа негізінен шикізат (мұнай, уран, күміс) экспорттайтынын айтады:

«Бұл өнімдер қосымша салықтан босатылуы мүмкін. Дегенмен, АҚШ-пен сауданың аз да болса үлесі бар, сондықтан қарым-қатынасты сақтап қалу маңызды. Қарымта салық салу қажет емес».

Трамптың мақсаты не?

Сарапшылардың айтуынша, Трамп бұл тарифті өзге елдердегі АҚШ-қа салынған кедергілерді жою үшін саяси құрал ретінде пайдаланып отыр. Қазақстан бұл "қара тізімге" ықтимал саяси себептермен енді. Саммиттерге қатысу, БРИКС-пен жақындасу — бәрі әсер етуі мүмкін.

Қазақстан экспорттайтын тауарлардың 95%-ы жаңа салықтан босатылғанымен, АҚШ-пен арадағы қарым-қатынасты тереңірек ойлау қажет. Трампқа ұнау немесе АҚШ-та өндіріс ашу — әзірге Қазақстан үшін қолжетімсіз шешім.