Трамптың баж салығы АҚШ-та заңсыз деп танылды

 Мұндай шешімді Вашингтондағы федералдық апелляциялық сот қабылдады, деп жазады The Guardian.

Істі қарауға шағын бизнес өкілдерінің арыз-шағымдары негіз болған. Құжатқа сәйкес, Трамп әкімшілігі енгізген көптеген «өзара» тарифтер заңсыз деп саналды. АҚШ заңнамасы төтенше жағдай кезінде президентке кең өкілеттік бергенімен, ол тарифтер, баж салығы мен салықтарды белгілеу құқығын қамтымайды. Салық пен тариф енгізу – Конгресстің айрықша құзыреті.

Соттың пікірінше, Трамп енгізген бірқатар тарифтер «көлемі, сомасы және мерзімі бойынша шексіз» және әкімшілік сүйенген заң шеңберінен шығып кеткен.

Тарифтер 14 қазанға дейін күшінде қалады. Осы уақыт ішінде Ақ үй шешімге шағым түсіре алады.

Трамп бұл шешімге Truth Social желісінде өзінше жауап қатты:

«Егер бұл тарифтер бір күні жойылатын болса, бізді қаржылай әлсіретеді, ал біз күшті болуымыз керек».

Ол баж салығын «америкалық жұмысшылардың мүддесін қорғаудың және бизнесті қолдаудың ең тиімді тетігі» деп атады. Өз әрекетін халықаралық төтенше экономикалық өкілеттіктер туралы заңға (IEEPA) сүйене отырып түсіндірді.

Тамыз айында АҚШ 65 елге қатысты импорттық тарифтерді енгізді. Бұл тізімге Қазақстан да енген. Бұған дейін Трамп Токаевқа хат жолдап, 1 тамыздан бастап 25 пайыздық баж салығы енгізілетінін хабарлаған болатын. Бүгінде 39 мемлекет пен ЕО елдерінен келетін тауарларға 15 % мөлшерінде, ал 26 елге 18–41 % көлемінде тариф белгіленді.

Сонымен қатар, америкалық лидер Индиядан келетін импортқа қосымша 25 пайыздық баж салығын енгізу туралы жарлыққа қол қойды. Бұған Нью-Дели тарапынан ресейлік мұнай сатып алуы себеп болған.